- مين اللي قال انو الحبر بيموت
الحبر متل الدم ما بيدخل التابوت
الحبر متل بعد كل ما تهجم اسرائيل
بتنفض عنها الغبرة وبتنتفض بيروت
الحبر متل مفتاح بيت بفلسطين
مخبا بقلب العجوز عمر السنين
مالحبر متل الدم والدم ما بينتسى
بعدو عم ينزف بصبرا وشاتيلا ودير ياسين
ولما رسمت بحبرك هاك الصبي
قال غسان طلع من ارضنا نبي
وصارت الرسوم تعبي هالصفحات
وتلعلع رصاصات بقلب الاجنبي
ولما سألو ليش ايديك مربطين
وضهرك للجمهور وتيابك مخزقين
قلتلهون ناطر تارجع عالقدس
بشي ثورة تيعرفو حنظلة مين
بس الثورات يا ناجي متل الكذب
لما يكونوا مية فصيل ومية حزب
نسيوا العدو وببعضهون تقاتلوا
شربونا المر وشربوا المي العذب
ولما صوبت عليهون سهامك الهادفة
قالوا منبعتوا علندن بآخر نفي
ضلو قلمك يعصرهون عصر
قالوا ما في حل الا عيونك تنطفي
وهيك كان يوضاس البكل العصور
هالباع ثورتو وارضو تيشرب خمور
بعت كاتم صوت عارض الضباب
تيخفت الصوت يللي فضح القصور
بس بعدها رسومك مشاعل منورة
بتدل عالاعداء اللي جوا واللي برا
وبعدو الحبر ما الحبر ما بيموت
يكتب على الحيطان : فلسطين حرة .
احسان المصري
ليست هناك تعليقات:
إرسال تعليق