غنية عاطفية 19: انسى سمر يا رشيد

يا رشيد،

المشكلة انو عم تعمم سمر مش وحدة. سمر انواع بس كل وحدة نفسيتا خسة جوات خسة عراية القائد زياد.

عندك سمر المحافظة. هاي اسوأ الانواع. بيكون في اعجاب متبادل بس الطريق مسكر لانو الله والدين والرسول والعدرا وبابا وماما وما شاكل وغير بلدان وقوميات واثنيات ما بتزبط. بدنا نفكر لقدام. العما، الله والوطن والعيلة، انتي بحزب الكتائب شي؟ عم يطلعلي سمرات بmini-jupes   بس دواعش عقلياً.

عندك سمر المنفتحة . هاي مش مشكل بالطريق. الطريق مفتوح بس الك ولغيرك حسب الاجواء. هاي مشكل. صايرة متل حسن صبرا بالشراع مين بيدفع اكتر منكتبلو.

عندك سمر العنيدة (مش امين الجميل) هاي بتبقى يمكن متفقين. بس في نكاية بتكون بالدم. بتفتش عايا شي معاكس لالك لتفاجمك. متل ما عمل مؤخرا سمير جعجع بالحريري. انو جايي عم تستلمني يا سعد وبدك تصاحب فرنجية. رح صاحب الجنرال.

عندك سمر المتسلطة. هاي ممكن تكون نسوية وجايي بهاللحظة تنتقم من كل الذكور بالعالم. بس الانتقام بالمطرح الغلط... بدا واحد طرطور. انو جبلي الجاط هلق وغسلي اجريي...

عندك سمر الضعيفة. هاي بدك تلاقي معا وسيلة لتحكي. احكي يا اختي. وتبقى بتندار من شي سمر تاني.

وعندك وعندك سمرات....

وانت جايي انت وكل رشيد متلك او متلنا مقدمين. والجنازة حامية والميت كلب. منافسة على ولا شي فعلياً.

سمر لجنة حكم بستار اكاديمي وسوبر ستار . وانت وغيرك بتجو بتقدمو. وحط شو بدك: شهايد، مصاري، فن، شعر ، ثقافة، شبوبية، تلفونات، سيارات . يعني متل انواع ستوديو الفن : اغنية شعبية، طرب، اغنية لبنانية، اغنية مصرية، عزف.....

حط شو بدك مشاعر ، رومانسيات، احاسيس، عواطف، كلام، .... برضو احيان ما بتقنع اللجنة. اللجنة احيان بتختار الاعطل. بناء على شو . الله واعلم. خبرات فنية.

مهما يكون جو المنافسة، مهما تقدم مؤهلات. ليك احيان الاختيار ما بيصير حسب المؤهلات . ممكن سمر تفضل الفقير على الغني او الغني على الفقير وبالحالتين عندا اسبابا الفنية....

انت ليش قاتل حالك عهالبرنامج. حضرو من البيت وضحاك . واذا ما عاجبك طفي التلفزيون لانو ما في غيرو. صدقني ما في شي بيستاهل.

الخيارات الخاطئة

تبقى انت مقدملا كل شي. بتقلا: باخدك بجيبك بطلعك بنزلك. شو بدك.

بتقلا مش رومانسي بس بين ايديكي عم صير روميو.

اخر شي بتقلك: لا انت مش "ستيلي" . مع انو بتكون شايفة . في نوعية عناد ونكاية مخيفة.

وبتصير تروح تختار اسوأ نوعيات  وبتكون قاشعة النوعيات العاطلة.

يعني اذا حدا شغيل ومعو مصاري وحدا عاطل عن العمل بتختار العاطل.

اذا حدا مثقف او متعلم وحدا امي بتختار الامي.

حدا محترم ومرتب و رايق وحدا زعوري و اخوت بتختار الزعوري.

بتذل حالك اخر شي كرمالا وبتبقى عم تلبط فيك. اخر شي انت حس عحالك كمان انو انت غلطان بالخيار .

وتركا خيي تاخد خيارات. تعمل COMBINATION  من كل شي في خيارات عاطلة .

وبتبقى مبسوطة انو بعصتك وبتكون بعصت حالا وهيي عارفة بس العناد . شو بدك تعمل يا شيخ.

الحياة ما فيها عدل. شوفي انا بس شوفك بحس حالي اني ملحد كتير وانو الله مش موجود.

مش معقول كل هالجمال هيدا وهالعيون الزرق بعمر الشباب عم يشتغل هيك شغلة.

انتي مفروض تكوني مينيموم ملكة جمال ، عارضة ازياء . هيك شي. قاعدة عم تشتغلي تنظيف من ورا ارطة بهايم.

بحس حالي بدي روح شيل الزبالة عنك.

لا ما فيها عدل الحياة. انا قلبي عم ينفطر عليكي.

انتي كيف اخدتي هالخيار.

ليك انت ملاحظ مستوى غبائك. مستوى مرتفع جدا.

تبقى بتعمل انو انت عم تحصمص عالليرة. انو اذا شي ب 1000 وشي ب 1250 بتشتري ال 1000 انو يابا عم توفر.

وبليلة وحدة بتروح بتصرفلك 400 – 500 دولار علذة عابرة من سيجارة ما. او لتفشخ بتشتريلا لمرتك قشاط من عند Aishti  ب 400 دولار. وبابقى عم تضحك وانت مبعوص.

اخر شي بتصير معود. مش منتبه انو هول كلون خوازيق عم تختارون. وبعد كل خازوق بتكون سعيد.

ليك ريس انت وقف السواجير وقف القشط. وقف كل عمليات الحيونة و فشخ بغير اشيا.

العالم بتعمل كتير خيارات غلط.

الدليل شوف كم حمار لاحق ابو بكر البغدادي وهوي قانعون انو بتعمل عملية انغماسية و انا حاجزلك طيارة عالجنة لتتعشى مع النبي و تعاشر حوريات.

والدليل الو امتدادو التاريخي. كم واحد الماني لحقو لهتلر عاساس انو هني احلى من العالم.

والليستة بتطول. لاحظ كم واحد بيحضر فيديو سيب ايدي لوائل ومنة وكم واحد بيسمع ام كلثوم او فيروز

العالم ما بتنتبه. المشكل انو بياخدو خيارات وبيوقعوك معون وبيموتوك معون. بس لا حولة ولا عورة.

انسى يا شيخ. بدك تقعد تدل العالم عخيارات. انت ركز عخياراتك كمان . ما انت كمان ما بتسلم. ما تفكر حالك اله. 

بعدني يساري

ذاكرين القول تبع انو اذا عمرك 18 ومش شيوعي بتكون غلط. اذا عمرك فوق ال 30 وبعدك شيوعي كمان بتكون غلط.

هياني رح دق بال 30 وما عم زيد مع الايام غير راديكالية وبعدني يساري وشيوعي.

صرت عم ازداد عنف وثورية تجاه المجتمعات الراسمالية ومخلفاتا الكولونيالية بالشرق تحديدا.

صرت عم ازداد قناعة بانو كتاب متل اصل  العائلة والملكية الخاصة والدولة هوي دليل للشرق.

من دون تهديم للعائلة بمفهوما البورجوازي الصغير وصولا للعائلة الممتدة والقبيلة ما في نوى

من دون الغاء الملكية الخاصة ما في امل.

من دون محاربة الدين بدون هوادة ما تبحثو نتطور ما شايفين شو مولدلنا من داعش و اشباها.

واي مهادنة من الشيوعيين ما رح تزيدون غير تراجع.

اللي هاجمو الاكليروس بالتلاتينات ما كانو كتار وما كانو خايفين وما كان المجتمع اقل تدينا.

من دون ضرب اسس العيلة ما تحلمو. بزواج مدني ، بمساكنة بغيرو.

من دون تحرر جنسي يقضي عالكبت الموجود المزروع باللاوعي تبعنا.

ليش القوميات والاثنيات والتكتلات بالله شو. بتحس حالك بغيتوهات.

وهيدي الاشيا ما بيحلها الا اليسار.

شي عظيم اليسار. وشي كتير ضروري اليوم.

هيدا اليسار يللي بحبو ببلش من انجلس هونيك.

وبتقلي يعدين ستالين قتل و بكمبوديا بول بوت سوى وكاسترو عمل بقلك ايه عملو كتير اشيا بس جزء كان يمكن لازم بوقتا ينعمل

وغلطو شي طبيعي . في حدا ما بيغلط.

بتقلي في خلافات في ضعف في اشيا بتخليك يمكن تمتعض كونك يساري بالماضي او بالحاضر بس مقابيلا في اشيا حلوة واكتر اكيد.

ليش ؟ لانو اليسار عظيم لانو اليسار مش بس هيك . في ناس مفتريين ما شايفين قديش هاليسار انتج للعالم كل العالم

انو اليسار كمان ما بس ستالين ولينين وتروتسكي.

يا خيي قليل هاليسار حول العالم شو طلع ثقافة ليللي بتهمو الثقافة.

واليمين عامة قليل ما يطلع ثقافة. حكينا عن هالشي لما حكينا عن اغاني الحرب الاهلية اللبنانية

رواية من ساراماغو بالبرتغال.

بريل وبراسنز وفيري قاعدين عنفس الطاولة.

في اعظم من كره فيري للعالم . في اداء بريل بيهزك بامستردام هوي وعم يشلي عرق

شي بيشبه القاء مظفر النواب لقصيدة شعر بس يلقي عن محمد الدرة او عن العراق بيبكي وبس يلقي القدس بيغضب بيثور بيخليك تثور معو وتضحك عمستوى البذاءة يللي بيوصلو  وبس يغني تراث عراقي يصير مغني مش شاعر وهوي اصلا ثوري من وقت اللي بلش بالاهوار لظفار لبيروت

قليل لتلاقي شاعر احترف الثورة متلو. كتار كتبو بس بلا ما يحاربو

في لوركا ، حكمت ، نجم والشيخ امام  ،

غيفارا عم ينناقش مع سارتر ودوبوفوار،

غسان كنفاني وناجي العلي،

مهدي عامل وحسين مروة،

يا اخي شو بيضلو يعد الواحد.  

جارا مقطشين اصابيعو عايدي عصابة بينوشيه يللي قتلت الليندي. سلفادور الطيب مات. هيدي كتبها نجم بمصر وغناها الشيخ

وبابلو نيرودا غنالو من مصر عدلي فخري

وفرقة المانية جايي بعد 40 سنة لتغني death metal لفيكتور جارا

مصطفى سيد احمد منفي من الاسلاميين وضلو يدق عالعود ويغني لقاسم امين بس كمان ضلو يشرب خمر لتسبب بموتو نكاية بالاسلاميين صورو مزروعة على الراكشا بالسودان

شيوعي فرنسي بال 90 عم يخبر عن مقاومتو للنازية

هيدا اليسار عظيم . ما في حدود.

ليللي هول مش عاجبينو مين بدكون: بوش او اوباما او اي رئيس اميركي، مارين لوبين بفرنسا ، نتنياهو بارض فلسطين، بشير الجميل بلبنان،

اه بدكون الخليفة البغدادي 

طيب هيدا اليسار وهيداك اليمين ولا تردد بين الخلافة والقرمطية متل ما بيقول مظفر كمان.

تفسير احلام

شو مدى الحدود بين الحلم والواقع؟ سؤال صار عم يطرح حالو عليي مؤخرا بشدة.

لانو عامة على قد ما هوي الواقع صعب وين ما كنت و شو ما كانت نوعية شخصيتك(حتى لو كنت كتير متفائل) اخر شي بتسلملو لهالواقع باحلامك وبتصير تتنازل شوي شوي. فكيف اذا

كنت متشائم ، انسى الموضوع. خود على اكتئاب وبكي ونحيب ودوا اعصاب.

بعد فترة بتبطل تحلم بتصير معود انو تنام الليل بهدوء. لشو الحلم اذا تاني نهار مع وج الضو رح يكون ميت. خليه ميت باللاوعي.

اذا بتنسى الاحلام وبتعيش متلك متل هالناس.

وفجاة بتكون عايش هالواقع بفحاجتو وسلبيتو هيك وفجاة بتمرق بشي كنت ممكن عامة انو تحلم في . شي ايجابي بيغير هالفجاجة لهنيهات . ليك بتضلك فترة ممكن مضعضع. وممكن تضل طبيعي بس مش مصدق انو هيدا الشي صار معك انت بالتحديد. انت المتشائم . بتضحك.

وعامة الحلو بهالحياة، حياتي انا على الاقل رغم كل فجاجتا وسلبيتي انو عم اقدر حقق كتير احلام بس بيجو ماخرين مع Delay  بالانجليزي انو الحلم يللي كان مفروض تعملو بعمر 18 بتعملو بعمر 26 بس انو بالاخر عملتو. وبتصير تتطلع وتضحك. انو ليك بالاخر عملت شي. ان تاتي متاخرا افضل من ام لا تاتي ابدا. وهيدا الشي قدرت اعملو بكل مجالات الحياة تقريبا: بالشغل وبالدرس وبالسفر وبالثقافة وبالموسيقى وبالمصاري وبالصداقة وحتى بالعلاقات العاطفية (اسوا مجال لالي).

وبمطرح من المطارح كمان بتحس انو احلى الاشياء يللي تحققت هيي اقل الاشياء يللي بتركض وراها  اما الاشيا يللي بتضلك راكض ومصر عليا احتمال كتير ما تصير. تروك التاريخ يلعب صدفو. اكتشاف مهم. هوي التاريخ بيجبلك يللي بدك ياه.

تروك التاريخ وحلام. احلام هنيئة.

هذيان

يعني متوقع انو اذا قعدت عالبار وهالصبية حدك ممكن تجذبا. بطبيعة الحال بهالوج المكش صعبة. وانت عامة ما بتنفرج اساريرك غير ما تعرف بواطن الاشخاص وتتعود عليون. هيدي ما رح تجذبا مع انو هيي للحظة بتفكر انو يا ريت بيحكيني هالبغل . وبتصير تحكي مع صاحبتا وتتضحك وهيديك تقلا ما شايفة كيف مجومس. فعلا بغل ما بيحس. هلق هيي ما عارفة عنك. لك انت معاشر بنات ومصاحب وما قدرت تجذب ومن ايدك يعني لانو انت ما بدك بتخاف من الارتباط . فهاي هلق بقعدة بار و قنينة بيرة بدك تجذبا. اتطلع بالحيط يا بغل. 

عم تتخيل معي الواحد بس يروح العدو يللي مقابيلو شو بيحس. هلق لاول وهلة بيفرح انو هاع ليك هيدا التعن دينو بعدين بيفكر بالموضوع انو العما كيف بندبر حالنا هلق. فيها ضعضعة المسالة مش سهلة. هيدا انا كنت باني حياتي عاساس وجودو. فجاة هيك بيختفي. خود مثل يا اخي. سقط الاتحاد السوفياتي او انهار. الاميركان امبسطوا بس اخرة النهار بلشو يفكرو انو هلق بطل في عدو كيف بدنا نكمل قامو اخترعو صراع الحضارات و القاعدة وهلم جرا. وقس على ذلك يعني من اميركا وروسيا لانت وجارك اللي ما بتطيقو مثلا.

مجرب تعمل شي صرلك فترة مش عاملو. تلعب فوتبول بعد فترة مش لامس طابة. لاول مرة يمكن من اكتر من 10 سنين بعمل شي بيشبه الرقص، هوي مش رقص فعليا ، منو دبكة ولا رقص شرقي ولا كوريوغرافي اعوذ برب الفلق، ولا تانغو وسالسا من بتوع المدارس، شي اقرب للتدفيش، ما بدو تعليم، حلبة مصارعة، بتتناغم مع الموسيقى العنيفة، بس مش مصارعة، شي اخوي اذا حدا وقع بتلمو. خيك هيدا بيصير. حلوة ها. في كمية غضب كانت عم تطلع شي محبوس من فترة. غريبة هيي بس تفكر فيها ومنا طبيعية . بس مين قال انو مفروض تكون الاشيا طبيعية وايمتى عملت شي بيشبه العالم.

بالمصنع؛
- مادام، المكنة تبعي عم تزعجني كتير و صوتا كتير عالي. في طريقة نلاقيلا حل.
- ما في شي يا ولد، كمل شغل عادي.
- مش سامعك.
- كمل شغل عادي.
بعد اسبوع:
- مادام المكنة انتزعت وصوتا عم يروح. في مجال نغيرا.
- ما بها شي كمل شغل عادي.
- طيب فيكي تشتغلي محلي، انا لا طايقك ولا طايق المكنة.
- عم تهاجمني.
# يتدخل عامل ثاني.
- زميل المكنة انتزعت كليا . رح ننقلك عقسم جديد مع الاستاذ.
- باي مادام (بلئمنة).

90 سنة

مرحبا انا شب لبناني. ربيت عتقاليد لبنانية منها مثلا احترام الكبير. في متلها هالعادة مثلا. خاصة اذا كان الكبير بالعمر كبير بالفكر وبالتضحية وبالاخلاق.

بس يا خيي جيل اليوم ما عندو كبير، بيطلعلك واحد جربوع بدو يهجم عبيو وجدو. ووحدة مش معروف قرعة بيا منين بدها تضحك عزلمي ختيار لانو مش قادر يمشي مزبوط. هاي بيقولولا عنا وجع يخلع نيعك خلع.

ولا هيدا جدك هيدا لولا انت ما كنت موجود. فاحترم نفسك واحترمو هاي اهم شي. شايفلو وجو مجعد. عمرو 90 لانو. بس ليك هيدا شب اكتر منك. هيدا بعقلو بيوزن بلد. هيدا العصاية يللي عم يتكي عليها هادد فيها جبال.

عرفتو عن مين عم احكي. اكيد لا. كل مرة ما بتفهموني لما اعطي امثلة فرح احكي مباشر.

هيدا اللي عمرو 90 ،  هيدا الحزب الشيوعي اللبناني .

عرفتو. في ناس ما بيعرفوه. في ناس ما بيعرفو مين ولادو. فينا نسميلون ياهون. بس تيعرفو حتى اذا جربو يحكو بالعاطل عن معرفة يلزمو حدودون واذا عن جهل يخرسوا افضل. لانو ليكو ما بقا  مسموح التطاول كيف ما كان. مش انا يللي عم هدد. بس هيدا حزب تاريخيا وفكريا عندو عنف ثوري. فهيدا الشي ممكن بايا لحظة يرجع. يعني خاصة انو طول عمرون العمال يللي هني اساس هالحزب ما عندون شي يخسرو غير قيودون. يعني ما بتعرفو بايا لحظة بيرجع بيدير ضرب الرصاص. خاصة انو اليوم الظروف مؤاتية كتير. ليس. ما علينا.  

خلينا نسمي يا اخي في ناس فقدو الذاكرة وفي جاهلين وفي عملاء وفي متواطئين وفي خونة وفي متخاذلين وفي فاشيين وفي طائفيين وفي صهاينة. هول رح نضلنا نحاربون كيف ما كان برصاص وبكلمة وبنغمة. هيدا  حدا عمرو 90 . عندو ولادو كتير ووين ما كان منتشرين.

هيدا ناهل من تراث ماركس وانجلز ولينين وستالين كمان. ما حدا يجي يقلي هلق هول يهود وماسونية. وما حدا يقلي قتلو عالم. يمكن قتلو بس اللي لازم ينقتل. عاساس انو الزعماء بلبنان وبالعالم العربي و ببلاد الغرب ملايكة. ما هول كلون قتلو واكتر وباسم الله وانبيائو.

هيدا ناهل من تراث غيفارا وكاسترو حرب انصار باسم الجبهة جمول منغنجا نحنا.

هيدا ابنو فرج الله الحلو يللي دوبو بالاسيد لانو رفض يخضع لقرار التقسيم، لانو فلسطين كانت وبعدا اولوية. ولانو رفض يخضع لنظام عربي قمعي بعدنا عم نتوارثو. 

و هيدا ابنو جورج حاوي يللي فجرو لانو كان عابر للطوائف. هيدا اول واحد قوص عاسرائيل وقت اللي غيرو رش رز.

هيدا ابنو شيخ متل حسين مروة، شيخ درس تاريخ حضارة  عربية اسلامية لبقتلو قوى اسلامية ظلامية بيسموهو.

وهيدا ابنو مهدي عامل يللي دقنو بتوزع فكر عالعالم والفكر بيخوف الجهلة فقتلو تيترتاحو.

هيدا بناتو لولا ووفاء ويسار  وهيدا شبابو جمال وميشال . سامعين بطرابين الحبق هودي طرابين الحبق يللي ضحوا بشبابون منشان الوطن. هول شيوعيين

هيدا ابنو فرج الله حنين شهيد الجامعة ووردة بطرس شهيدة النقابات. هيدا عامل كتير للشعب وللبلد.

ولك يا عمي ان ضليتني عد ما بخلص. عيلة كبيرة كتير وبفتخر بكل واحد فيها.

من بعد هالحكي اذا حدا بيفتح تمو من هلق لشهر بيشوف شي ما بيعجبو.  في نياع بدا تنخلع وفي رقاب بدا تنفك.  ايه نعم انا الجبان عم هدد. بس انا متل غيري ما عندي شي اخسرو. وما خايف من شي حتى الموت. هيدا الحد الاقصى. ما انا عنصر زحاف بهالعيلة. واذا انا الجبان وهيك فكيف القبضايات.

اذا ما حدا يحكي. بدنا نعيد ونفرح .

بعد العيد لكل حادث حديث. يمكن نفوت عمستشفى بس تنطلع اقوى .  ويمكن يصير كتير اشياء.

بس اوعى تفكرو انو هالختيار يللي عمرو 90 رح يموت. فشرتو برقبتكون. هيدا ختيار اذا شفتو تعبان بتساعدو بتقلو قوم يا جدي. مش بتقعد تدفش فيه.

  معقول يموت حدا عندو هالعيلة. ما رح يموت قبل ما نموت نحنا او يللي رح يجو من بعدنا.

هيدي سنديانة حمرا ما بتموت . في ورق بيوقع. بيطلع غيرو. في ناس بتجرب تقصا ما بيطلع بايدا. مشرشة بالارض.

هيدي سنديانة حمرا. هاي احلى سنديانة.

ذكرياتي معك

ذكريات كتيرة بتمرق.

كان فيها اشياء حلوة.

صوتك بعدو هون.  عم تغني بحفلة.

و شعراتك وانتي تاكية عليي.

وكمية البوسات الضخمة يللي بتستخدميها، خاصة من بعد كل انجاز

عالارجح تكوني نسيتي.

يمكن اساسا كنت مرقة طريق.

حدا انجمعتي في منشان مصلحة آنية.

وبس تنتهي المصلحة بينتهي دورو.

مني رسول. ما انا جمعتني فيكي المصلحة.

واكيد كنت معتبرك مرقة طريق ربما.

بس في اشياء بتضل

في اخبار يمكن ما مخبرتيها لحدا غيري .

شي عن مشاكلك بالعيلة.

شي عن مشاكلك مع صديق ما.

شي عن مشاكلك مع اختك او صهرك

وكل النق. 

بيقولو انا بنق . بس النق الو مستويات كمان

وهون انتي بتتالقي وانا مجبور اسمع كل هالمشاكل 

عاساس انو انا زغلول. 

شي عن امور نسائية يمكن ما بيتجرأ حدا يخبرها غيرك. 

كل هوليك يللي بيدعو التحرر ما عندون الجرأة.

الجرأة وحدة من الاشياء النادرة عندك.

والضحك. الذ شي فيكي الضحك

وانا شغلتي الضحك. هيك مهنة متوارثة.

واللعب. عشوية خوات .

انا بعدني ولد وساقبت انتي كمان .

رح تجربي تنسيهون ويمكن صعبة بس جربي

مفروض نجرب ننساهون. 

هلق يمكن نحنا هون.

بعد شوي يمكن كون باوروبا او افريقيا او بالخليج

ويمكن انتي كمان تكوني باوروبا او افريقيا. 

مرقة طريق بس كانت منيح لو طولت اكتر

برغم كل العثرات فيها.

برغم كتير كذب اكتشفتو بعدين

واخبار غريبة.

برغم كل شي.

ما منيح الجفا هيك

تلفون. ليش في شي مثير اكتر من صوتك 

في شي اجمل من كلماتك يللي بتنساب بسهولة ومن دون خوف او تعقيد.

تلفون او  كلمة. منشان الذكرى.

بس لا حول ولا

بدنا نتعود في اشياء منحبا وبتموت.

كل شي بموت

حتى الاشياء يللي حبنا لالا كان غلط 

والاشياء يللي اساسا ما بتنحب 

والاشياء يللي منحبا صح 

كلو رح يموت بالاخر

بيضل في كمشة صور لبعدين 

بيرجعلون الواحد 

كذكريات