شو بعيد

- شو بعيد
متل تغريد
عصفور بهالمدى وحيد
مرق عرف الحمام
ما ضرب سلام
لفي ععشو
وغفي عسطح قرميد
- شو بعيد
متل بواريد
عمر الزمن صدى الحديد
بواريد ملفوفة بتياب
ومدفونة تحت التراب
ناطرة شي ثورة
لتلعلع رصاصتها من جديد
- شو بعيد
متل عواميد
ببعلبك بناها العبيد
ماتوا عم ينقلوا حجار
تيعلى بمملمكتون عمار
ويكبر القهر بقلوبهون
اللي ما بتعرف العيد
- شو بعيد
متل شهيد
غنى لبلادو النشيد
مات مع رشاشو عالمتراس
ما صور حالو لتعرفو الناس
وبدل ما رصاص العدو يقتلو
جرحو رصاص الغدر بالوريد

- شو بعيد
متل تنهيد
عاشق نسيتو المواعيد
صار بالمنفى يلملم الحسرات
ويعد بسيجارتو الآهات
كلما مرق يوم
الجفا بيزيد
- شو بعيد
متل شريد
نام تحت جسر الحديد
لا عندو بيت يرجع لي
ولا تخت يتسطح علي
لا موتو بيؤذي
ولا عيشتو بتفيد
- شو بعيد
آخ شو بعيد