الجمعة، 15 يونيو، 2012

ردي منديلك ردي

"ردي منديلك ردي
بيضا والشمس حدة
بكرا بيجي محبوبك
وبيلاقيكي مسودة"

ما بعرف ليش كلما سمعت هالغنية الفيروزية بتذكرني فيكي
يمكن صوت فيروز الملائكي بيذكرني بملائكيتك
يمكن منديل فيروز او وج فيروز او اعتزال فيروز الحياة
ردي منديلك ردي. هالمنديل الابيض يللي عطول كان على وجك وكتير ملائم لانو هالطهارة و النقاء والبراءة ما بيناسبها غير اللون الابيض
بعدين ردي هالمنديل تيرد عنك حدة الشمس وتضلي بيضا وكمان لتحميكي من كتير وسخ بهالمجتمع
ردي بكرا بس تطلعي تلاقي محبوبك الاستاذ ممكن يشوفك مسودة وهوي ما تعود عليكي غير بيضا متل التلج. هيك بيكتبلك قصايد بالعربي الفصيح


ردي منديلك بس خلي مطرح ليضلو يبين تمك عم يضحك. عطول تمك عم يضحك. دائما متفائلة ما بعرف منين كنتي تجيبي كل هالتفاؤل بهالعالم الصعب
ردي منديلك تشوفك آخر مرة قبل ما روح. ما انا قماز السطوح (هيك سميتيني مرة لما نسيتيلي اسمي). انا بعدني عم قمز على سطوح هالدني واهرب من مطرح لمطرح بس هالمرة من دون ما تكون في بسمة ودعاء عم يحرسني
ردي منديلك ردي لآخر مرة  

هناك تعليق واحد: