الثلاثاء، 10 يناير، 2012

بعدني يساري

من يومين كنت بالضيعة.
تروقت وتغديت مع اهلي وحكيت معون بحر كلام. 
شقيت عستي المريضة. 
ومرقت عالميني ماركت حد البيت اخدتلي كم غرض.
ما مرقت عالمسجد لانو مني مؤمن كتير. 
رحت عند الحلاق. حلقت شعراتي ودقني. 
ورجعت رحت عمحل الانترنت والبلياردو بالضيعة تشوف اصدقائي. 
رجعنا رحنا سهرنا وشربت كباية شاي لانو ما بدي اشرب كحول لاسباب صحية ومش دينية. 
كمان بالسهرة دخنت سيجارة تبغ مش حشيشة لانو ما بحياتي مقرب على الحشيشة. 
تحملت شوية تقاليد وعادات بس ماشي الحال. 

اول مبارح نزلت عبيروت مطرح ما مستأجر لانو اقرب عشغلي .
وعيت الصبح. 
رتبت التخت و الغرفة كلها على بعضها. 
ولبست تيابي المرتبين عاساس.
نطرت الباص حتى روح على شغلي لانو ما معي سيارة. 
زمطت لقدم وراق هجرة عبلد غربي لانو حابب هاجر على بلد محترم.  
عشية رجعت عالشقة دورت موسيقى للشيخ امام منشان ما اسمع "ترشرش".
وبعدين قريت رواية صرلي شي جمعتين بلشت فيها ونمت بكل بساطة.

فيكون تخبرو ابراهيم الامين انو هيدا كلو وبعدني يساري.


ليست هناك تعليقات:

إرسال تعليق