الجمعة، 13 يناير، 2012

امثال شعبية 1

- عنجد انو الامثال ما بتكذب . امثالنا الشعبية يا خيي نتيجة خبرات تاريخية. هلق احيان ما بتفهم هالامثال لتلاقي تطبيقاتها عالواقع.

- يعني مثلاً  "ما بيضحك للرغيف السخن". هيدا المثل ما كنت افهمو . انو شو الرغيف السخن بالله. لحد ما تعرفت عليك يا استاذ. يعني ولا خيي انو معليش اذا زمطتلك ابتسامة مرة بعد مرة. يعني والله انو وجك "متل ورقة النعوة". مالضحك بيطول العمر. هلق مش ضروري تضلك تضحك باستمرار يعني ساعتها منصير نضطر نقلك "تضحك على وج الدست". 

- مثلاً كمان انو "ضاربة حالها بصرماية عتيقة" (او شدة عتيقة) يعني هيدا المثل دوموازيل ما كنت افهمو لالتقيت بحضرتك. يعني انتي بتمثلي الصرماية العتيقة بابهى تجلياتها . انو يابا انتي نازلة من المريخ وبقية العالم من الارض او كيف؟ . شوية تواضع بيسوى احيان وممكن بسمة بعد بسمة منشان الرغيف السخن. يعني عدا عن هيك "فوق الدكة شرطوطة". انو كمان الصباح لالله يعني معليش اذا رديتي التحية . ويعني ما عم نضربلك تحية لانو كتير حابينك بس متل ما بيقول المثل : "إللي بيعوز الكلب بيقول له صبحَك بالخير يا سيدنا". 
بعدين انو مفكرة انو العالم نسيت انتي مين ومنين وكيف. ايه معليش. "نسيت يا فلاح زمان كان كعبك مفسَّخ والزبل محشي فيه"

- و"الدفا عفا ولو بعز الصيف". فكيف بايام تلج زمهرير وانا بعد شوي رح البس كلسون عصبة وحضرتك دوموازيل لابسة تنورة قصيرة وتحتها كولون رفيع. انو ما بعرف انو ما بتحسي بالبرد مثلاً. ما بعرف. بعدين مش ضروري تلبسي كعب عالي خاصة انو منظرك عامة ما بيساعد. ومتل ما بيقول المثل "اجريها عوج وبدها بابوج".

- بعدين "الكنيسة القريبة ما بتشفي" هيدا شي مجرب. يعن قد ما حاولت عالقريب ما بينفع روح يا خيي بعد عكنايس بعيدة وصلي هونيك. 

يتبع...... 

دويك الاحمر 

هناك تعليق واحد: