الاثنين، 17 سبتمبر 2012

هاي هيي جمول



مرة واحد رفيقي سالني: شو هاي جمول اللي بتضلك طاوشنا فيها.
"جمول، هيي ريحة الخبز، هيي ريحة التراب اول ما تشتي الدني"
هيك رد الاسير المحرر عفيف حمود بس سالوا بمقابلة تلفزيونية عن جمول.
جمول هيك واكتر من هيك.

---------------------------------------------------------------------------------------------------------------------

1-      جمول هيي تاريخ تجمع من وقت اللي حمل عساف الصباغ بابل السقي بارودتو دفاعاً عن فلسطين (1936)، ليوم اللي استشهد علي ايوب بعيناتا وحملو جورج حاوي على ايدو(1972).
من الحرس الشعبي والانصار (1969) لجبهة المقاومة الوطنية لتحرير الجنوب من الاحتلال والفاشية (1978).

---------------------------------------------------------------------------------------------------------------------

2-      جمول هيي نداء اطلق من بيت كمال جنبلاط على المصيطبة ووقعو جورج حاوي ومحسن ابراهيم.
جمول هيي رصاصة خالد علوان بمقهى الويمبي
وجمول هيي رصاصة جورج قصابلي و محمد مغنية على صيدلية بسترس.

---------------------------------------------------------------------------------------------------------------------

3-      جمول هيي تاريخ من العمليات بلش من ال 1982 وما خلص بال 2000.
وجمول هيي اسماء شهداء من كل لبنان:
لولا عبود وجمال ساطي وقاسم الحجيري وزياد الحداد من البقاع،
وعلي عبدالله سليم وميشال صليبا وانعام حمزة وبيار ابو جودة من الجبل،
ويسار مروة وفرج الله فوعاني ووفاء نور الدين واياد قصير ويسرى اسماعيل من الجنوب،
والياس حرب وائل نعيم و حسام حجازي من الشمال،
وهيي كتير اسماء ما بتساعون الصفحات ولا الصور ولا الكتب بكل ضيعة وبكل حي بلبنان.

---------------------------------------------------------------------------------------------------------------------

4-      اكتر من هيك جمول اكتر من مقاومة عدو اسرائيلي.
جمول كمان جسد فرج الله الحلو اللي ذاب بالاسيد
وجمول علم لبنان على كتف جورج حاوي قبل ان يغتال غدراً
وجمول كتابات مهدي عامل وحسين مروة وسهيل طويلة ومثقفي الحزب قبل ما يموتوا
وجمول جرح على ايد سهى بشارة وانور ياسين وسليمان رمضان ورجائي ابو همين
وجمول هيي احلام احمد المير الايوبي ووليد صعب و"جلال" المعوش بلبنان جديد
وجمول هيي نضالات وردة بطرس والياس الهبر ومصطفى العريس
وجمول هيي غناني زياد الرحباني ومارسيل خليفة وخالد الهبر وسامي حواط
وجمول هيي افلام مارون بغدادي ونهلة الشهال
وجمول هيي مسرحيات روجيه عساف ويعقوب الشدراوي
وجمول هيي صفحات ومقالات بالسفير والاخبار والنداء وبيروت المساء
و جمول هيي صوت مقاوم عبر صوت الشعب
---------------------------------------------------------------------------------------------------------------------


5-      جمول هيك واكتر من هيك.
جمول هيي لكل الشيوعيين
يللي بعدون بالحزب ويللي فلوا من الحزب
يللي بالقيادة ويللي بالمعارضة 
جمول اكبر واعظم من اللي بقيو واللي فلو واللي قادوا واللي عارضوا واللي قعدوا على جنب.
منشان هيك رح نحتفل متل كل سنة وخاصة هالسنة بالذكرى الثلاثين، رح نحتفل بجمول غصباً عن كل العالم شيوعيين وغير شيوعيين منشان ارواح الشهداء المذكورين سابقاً تضلها تهدينا.
جمول هيك واكتر من هيك.

احسان المصري

ليست هناك تعليقات:

إرسال تعليق