الجمعة، 23 مارس، 2012

النظام بين بيروت ودبي

- حلوة دبي شو بدكون بالحكي يا اخي. مدينة مصطنعة بس حلوة . ومدينة منظمة. يمكن اول مدينة عربية فيها نظام . في مصاري مدفوعة بكمية منشان تصير حلوة بدون شك. وكان ممكن تندفع بغير محل (بفلسطين مثلاً) بس هيدا موضوع سياسي والو تتمة. كمان في كمية من العمل صارت منشان تنبنى هالابراج على ضهور العمال الآسيويين بشكل رئيسي بس هيدا موضوع طبقي والو تتمة.
موضوعنا هوي النظام. نظام السير مثلاً. في نظام للسير مش متل عنا. يا اخي بدبي الاشارة حمرا ما حدا بيقطع لانو بيعرف حالو رح يموت بينما عنا بلبنان بيقطع وراسو مرتاح وبيقول باي للكاميرا يللي حاطينها منشان تراقبو وبيحيي الدركي كمان يللي مفروض ينظم السير. اشارة حمرا ما هيك. 
ولك بدبي اذا في مشاة على طريق فرعية بيخلوهون يمرقو. شي متل اميركا. في احترام للمشاة. ايه هوني بيطلع عليك. ما عم تأخرو بالنهاية. 
خدلك نظام المواصلات يا اخي التاكسي في عداد. يعني بتعرف انو ما رح يقرطك سلف. في عداد وبتدفع عقد المسافة. هون ببيروت بتدفع عمزاج السائق. يعني هون ممكن تطلع اول نهار من المحل الفلان عالمحل الفلاني ب2000 ليرة. تاني نهار نفس الطريق ممكن يطلب منك شوفير ما 10000 ليرة. كيف بايا منطق. ما حدا عارف شي من شي. 
يا اخي ليش تخيل انو مطرح ما في عجقة بدبي . بشي "مول" مثلاً بدك تنطر بالدور منشان تاخد تاكسي. مزودينا مش هيك. ايه معليش تعود عشي اسمو "الصف" هيدا ما في منو بلبنان. وهيدا الصف ما بيميز بين اسود وابيض وهندي ووو .. هيدا بينطر في الاوروبي (يللي بتعتبدو بلبنان) متلو متل الباكستاني متل اللبناني متل الشاطرين. ما في تمييز عنصري. وما في "عارف حالك مع مين عم تحكي".

نفس الشي بالباص بتقطع بطاقة وبتنطر بالصف. وبتمشي عالوقت من المحل الفلاني عالمحل الفلاني. ايه بلبنان باص رايح من عين المريسة عنهر الموت ممكن تهبلو يكوع عالدورة مثلاً اذا ما معو ركاب وباص رايح من انطلياس عالحمرا ممكن يوقف بالاشرفية حتى يروح يرتاح ببيتو عشية خيي. بعدين عندك المنافسة بلبنان قليلة المنافسة. خود مثلاً بين باصات الحريري وباصات المر عخط المتحف- برمانا مثلاً. انو الاسلام عم يجو عبرمانا. كتير هيك. وفي خطوط محتكرة يعني خطوط الشوف مثلاً ممنوع يطلع عليها جحش الدولة والا بياكلها قتلة من زلم وليد بيك. وفي خطوط حاطين عليها شوفيرية من الاخوان السوريين يللي بعض منهون ما بيعرفو البلد يا اخي. يعني ممكن يطلع راكب ويقلو رايح عالمحل الفلاني فبيقلو لا وهوي بيكون قاطع بنص دين المحل الفلاني. رواق عالآخر. 
بعدين عندك الوقت. مهم الوقت شي. بلبنان اكيد لا. يعني ممكن الباص ينطرك ربع ساعة ليحمل ركاب. او "يحدل" عالطريق شي نص ساعة. الك معو شي. بعدين "كل ربع ساعة بيمرق باص" هيدي اكتر شي غلط. يعني ممكن يمرقو تلات باصات خلال خمس دقايق ويقوطبو عبعضون ويسبو لبعضون وتمرق ساعة ما يمرق ولا باص.منافسة. شو بدك تعمل. نظام رأسمالي حر. حر هوي الك معو شي.

انسى يا اخي. ولك بدبي طبقو قانون منع التدخين بالاماكن العامة (ما تفهموني غلط انا بدخن). بس اذا دخنت بالمول مثلاُ بتاكلها غرامة. بينما بلبنان في حال صدر القانون صعب يتطبق بطبيعة الحال.
ليكو خيي اذا بدك تعرف اللبناني بدبي. هوي الوحيد يللي بيدخت تحت ال No Smoking. 
نظام PAL او SECAM. حيالا نظام. بدكون تسقطو النظام. عراية الرحباني :"لتعمل ثورة عالنظام لازم اول شي يكون في نظام وتاني شي يكون في نظام ..... ".

ليست هناك تعليقات:

إرسال تعليق