الاثنين، 28 أكتوبر، 2013

الك عمري كتبتو

-          الك عمري كتبتو بالنار وبالاغاني. هيك بتقول كلمات الاغنية.
بس اكتر من هيك،
الك عمري كتبتو بالنار، النار الللي طلعت من بارودة من بارودة عساف الصباغ سنة 1936 ضد العصابات الصهيونية
النار اللي طلعت من بواريد الحرس الشعبي سنة 1969
النار اللي طلعت من بواريد مقاومي وشهداء واسرى جمول من 1982 لل 2000
والك عمري كتبتو بالاغاني ، اغاني مارسيل خليفة و زياد الرحباني وخالد الهبر و احمد قعبور و اميمة الخليل و سامي حواط وويليام نصار
انتي الك قصيدة،
لأ انتي الك قصايد،
في اجمل من قصايد لولا الياس عبود وفرج الله فوعاني وجمال ساطي
في اجمل من قصايد حب كتبها جورج حاوي ومهدي عامل
الك عمري كتبتو، وكتبت عن الناس اللي راحو، اللي ماتو عبكير
عن فرج الله الحلو، يللي ذوبو جسمو بالاسيد وتواطئ عليه كل العالم حتى "رفاقو"،
عن جورج حاوي، يللي تفجر وما رح نحكي كيف وليش،
عن فؤاد الشمالي، اول امين عام وعن تشويه صورتو
عن مهدي عامل و حسين مروة سهيل طويلة وخليل نعوس و ميشال واكد و نور طوقان و لبيب عبد الصمد وكل اللي ماتو وسكتنا

عن فرج الله حنين اول شهيد للطلاب
وعن وردة بطرس شهيدة النقابات
وعن سعد الدين مومنة وابراهيم العريس والياس الهبر والياس البواري وكل النقابيين
الك عمري كتبتو لاني خايف،
خايف من حكم الطوايف،
خايف من الرجعيات والسلفيات والديكتاتوريات،
وخايف من الامبريالية ومن الصهيونية،
وخايف من حالنا،
خايف نصير متل غيرنا،
خايف يجي يوم ونبطل نغني،
بس برغم كل شي الك عمري كتبتو،
والك عمري رح اكتبو عن الناس اللي جايي، قد ما يكونو قلال، رح يضل في ناس تجي لانك احلى سنديانة.
            

ليست هناك تعليقات:

إرسال تعليق