الأحد، 14 نوفمبر، 2010

بعد في ناس طيبين قولوا الله

- بعدنا طيبين قولوا الله .... بعدنا طيبين .. يمكن في ناس حولنا عم تموت وفي ناس عم تموت غيرها .. بتموت غيرها مش بس بالحرب الاهلية يللي بتروح وبتجي متل الدورة الشهرية .. بتموتو من طريقة التعامل اليومية ... بتموتو من كمية العنف والكبت والقهر والحقد يللي موجودة بالمجتمع اللبناني .يعني الله يرحمك يا فرويد بس لو كنت بالمجتمع اللبناني كنت كتبت مجلدات على مية مرة اكتر من يللي كتبتون وبدل عقدة اوديب كان طلع معك عقدة "باب الفان" مثلاً .
- بعدنا طيبين قولوا الله ... بعدنا طيبين رغم كل هالبشاعة يللي محاوطتنا .. بعدنا طيبين مش بس احياء . بعدنا طيبين من طيبة القلب.. اي هيدي عملة نادرة .... بس موجودة . اي بعد في ناس قلبا طيب انو ما تستغربو كتير . صحيح المتعارف عليه انو اللبنانيين زعران و انو ما بيمشي حالك بهالبلد غير ما تكون ازعر ايه بس في بعد كم واحد عم يشذوا عالقاعدة . بعد في كم واحد اهبل او غشيم او بليد او معتر او على نياتو . هودي بيشكلو مصدر ازعاج للزعران يللي متليين الارض.
- بعدنا طيبين لانو بعد في ناس طيبين . قلال . قلال كتير . بس موجودين .عندي صديق ابن مدينة . كنت استغرب كيف صامد بالمدينة . انو مش خرجو . واحد قلبو طيب بالمدينة مش راكبة . لانو كل النماذج يللي قطعت عراسي بتثبتلي العكس . هلق مش يعني انو ولاد الريف اوادم. بس هيدا بالمدينة يعتبر شذوذ . كان رفيق عمرو يضحك عليه انو قلبو طيب . انو بعد في منون هودي ووين ؟ بنص دين بيروت الكبرى .

- ايه ولاد الريف منون ملايكة . لا ابداً . هون المشكلة . ولاد الريف يللي بيجو من مطرح مفروض بعدا تكون القيم الشرقية مسيطرة ومفروض يكونو طيبين بس كمان عم يثبتو العكس عن جدارة . ما بعرف يمكن معون داء العولمة . يمكن تاثروا بولاد المدينة لانو بطلو طيبين .... قولوا الله . صار في نسبة حقارة مرتفعة بالريف ومحسوبكون دويك الاحمر اكتر واحد بيعرف هالشي .
- الانسان عامة بطبعو شرير بعكس ما بتقول الاديان . وبلبنان زايدة كمية الشر . و الشر عم يغلب الخير يعني عكس ما بيصير بالافلام . وليكو شغلة اللبنانيي ما بيعبدو الله . ايه هي انا اكيد منها . لو بيعبدو الله ما كانوا بيقتلو وبيدبحو وبيسرقو باسم الله . يعني بعد البحث والتدقيق بيتبين انو اكبر نسبة الحاد هيي بالمجتمع اللبناني . وفي منون عبدة شيطان كمان . طيب شو بدكون تسموا خمسين قبضاي من طايفة اجتمعوا عواحد من طايفة تانية ونكلولو بجثتو . يعني متل طقوس عبدة الشيطان تمام . وبيصيرو يرقصو حول الجثة كمان . طيب الدولة ما بتلاحقون متل ما بتلاحق عبدة الشيطان الرسميين . حدا جاب سيرة الدولة !!
- منرجع لولاد الريف يللي مشهورين بالكرامة والمروة والنخوة بس وضعون هالايام تعيس جداً . عندك مثلاً انو الجار قبل الدار بس هيدي بطلت صحيحة ابداً والاقارب عقارب هي شبه صحيحة . دويك الاحمر في يخبر كتير عن هالامور . دويك من الناس الطيبين....قولوا الله . قولوا الله او الشيطان او ما شي ( حسب معتقداتكون متل ما ذكرنا سابقاً ) .
- دويك بيجرب يكون ازعر . بس ما بتزبط . وهوي ابن ريف . ابن مطرح ما مفروض يكون في طيبة . بس ما عم يطلع الا عكرتة . مش عم يطلع غير البنت القحبة يللي ما بتخلي شب يعتب عليها وبتتضحك على دويك انو ليك هيدا ملا منظر. مش عم يطلع غير الخرفان يللي بدون العالم يكونو زعران والا بينكروهون شي متل احادية بوش – بن لادن ومن ليس معنا فهو ضدنا . مش عم يطلع اخوة بدل ما يسندو ضهر بعضون بيخوزقو ببعضون . مش عم يطلع .... خلينا نوقف هون احلى ما يطلع حليب النور .
- الوضع سوداوي ومأساوي واللي بدكون اياه . بس شوفو النص التاني من الكباية . في امل . ايه في امل . بعد في ناس طيبين . بعد في واحد صديقي . لا هوي من عمري ولا مجايلتي . ولا ربينا سوا . بعد في هيدا الشخص يللي ما بدو مني مصاري ولا مصلحة ولا بدو مني شي بالسياسة ( بالاذن من الرفاق السابقين والحاليين ) . بعد في شخص بيوقف عالطريق ليقلك مرحبا وكيفك وبلهفة اكتر من عمومتي وخوالي وعماتي وخالاتي والسليلة كلها مجتمعة . بعد في شخص بيسأل عنك مباشر لا ب SMS ولا بE-Mail ولا ب Facebook Message . بعد في شخص بيزورك لانو بدو يشوفك يعني مش جايي لانو مفروض عليه ما حدا جابرو ولا لاقطو على ايدو ( ليكو ما حدا فارض على حدا يحكي مع حدا او يسلم على حدا او يزور حدا منا شغلة اجبارية ويا ريت منخفف نسبة هالكذب والنفاق والدجل الموجودة ومنبطل نتصنع ) . بعد في واحد هيك ممكن . بعد في ناس طيبين .. قولوا الله . قولوا الله او الشيطان او ما شي.
- دويك يا دويك ... خليك احمر يا دويك . ايه بس خليك طيب يا دويك .

دويك الاحمر

ليست هناك تعليقات:

إرسال تعليق