الجمعة، 1 أكتوبر، 2010

دويك الاحمر


- دويك يا دويك
يا ريفنا الغافي
شو تجرحوا عينيك
من دمعك الصافي
شو تشققوا اجريك
من المشي حافي
شو تسمعوا دينيك
عحكي الخرافي
- دويك يا نجمة
حمرا على الاعلام
دويك يا بسمة
حلوة بهالاحلام
دويك يا كلمة
كتبتها هالاقلام
دويك يا نغمة
عوتر منضام
- دويك يا معاز
ساكن بهالغابي
لا بتعرف الالماز
ولا فلوس كذابي
لا هوية وجواز
لا قرايي و كتابي
لا نفط ولا غاز
بس مي من الخوابي
- دويك يا فلاح
عامل بحقلاتك
مملكتك التفاح
وقصرك بكرزاتك
قديش العمر راح
وشو ضل بحياتك
كلها الم وجراح
قرب عمماتك
- دويك يا تلميذ
نازل عالمدينة
ولك شوف هالتمييز
في سمن وفي طحينة
تعلم تقول بليز
وتعلم عالضغينة
تفرج على ستريبتيز
بعينيك الحزينة
- دويك يا جندي
صامد على الحدود
حربك هيي وحدي
وعدو واحد لدود
ندرناك للتصدي
تحمي ارض الجدود
ما ترجع الا بوردة
او باكليل ورود
- دويك يا دويك
خليك احمر يا دويك.

احسان

ليست هناك تعليقات:

إرسال تعليق