حكم زيادية 1

-          "في اشياء غريبة يا شيخ انتي ليك شعر المرا قديش حلو شعر مرا يا خيي ما حلو ؟ اوف شو حلو. وليك بنفس الوقت شعرة وحدة ما اقرفها وين ما لقيتها يصحن شوربة ماجي مثلاً ؟ ما حدا يبلش يتقريف بتصير . بصحن شوربة ماجي او مثلاً على مرد تخت ابيض او شعرة لافة على رمش ولد قد ما بتحبو ومبوستو امو. شعرة طالعة علقانة بكستك الساعة وكستك حديد وتعا سحبا كلا وشيلا بقى. بالعجينة يا خيي . هيني بالعجينة وتعا شيل الشعرة من العجينة او شعرة مثلاً جايي مختومة مع علكة وعلوك وسحب وعلوك. ما بعرف. بس رجاع تذكر انت اذا قرفت رجاع تذكر شعر المرا كلو مع بعض وحلل وناقش":

يعني بعد كل هالحكي شو بيقول الواحد يمكن يا اخي شعر المرا رائع وهيي بعدها ضاهرة من الحمام جديد شي مخيف ومثير بس يا اخي شعرة وحدة علقانة على الجاكيت مثلاً ايه بتلعي النفس. شو بدنا نحلل ونناقش اكتر من هيك.

-          "ليك اذ1 قررت واحد ما تسمعلو ما تقلو سكوت مثلاً افضل تقلو احكي خيي احكي وانتي بهالوقت ما تسمعلو. وحياتك فظيعة جربها":

فعلاً جربها هيدي. تخيل خطيبتك او صاحبتك يا رجل عم تنعي على راسك بتفاصيل التفاصيل عن شو صار معها بالشغل او الجامعة وانت مجبور تسمع وتجاوب. طيب يا اخي ما آخر شي بتقرف حياتك بس مصيبة تقلها سكتي. خليها تحكي وهز براسك. قلها ايه كل فترة او منيح او الله يهدي البال او بسيطة... وعمول حالك سامع وانت مش سامع.

-          "ما تتوقعو جميعاً المناح والعاطلين انو اذا انا شيوعي مثلاً ما يحلالي مارس هالاخلاق الشيوعية الا مع الرأسمالية ايه لا بالعكس يا شيخ انا انساني مع الانسانيين ورأسمالي مع الرأسماليين لانو هني طبعاً بيتمنو كل العالم يكونوا شيوعيين الا هني ليه ليستغلوون لانو الشيوعي مثلاً ما بيفكر يستغل زميلو هني لا آخدين عنو. منشان هيك يا عزيزي انا بتصرف اقطاعي مع الرأسماليين وامبراطوري مع الاقطاعيين":

يعني بعض الناس مفترضين انو بما اني شيوعي مفروض مثلاً ساعدون مادياً مع انو هني اغنى مني بزمان فبعتقد هيدي الجملة كافية للرد.

-          "بتعرف انو بعدني يومية بقرا الجريدة. هيني هاي؟....":

انا بعدني بقرا الجريدة يومية وما بفهم شي برضو.

-          "شو هيي هالقد معقدة حياتي بتلات اسطر بتنقال كلا" :

انا حياتي مش معقدة متل حياة زياد. لا بلعب بوكر ولا بشرب كحول. لا بحضر تلفزيون ولا فيديو. اذا ما كنت بالشغل بكون بالبيت عم بلعب غيتار واذا ما كنت عم بلعب غيتار بكون نايم وهون بكون احسن شي.

-          "خيي شو بيعرفني يا خيي شو دين ربها هالمراة. ما عم بعرف. يعني نفسيتها هيي قصة ما بعرف شو بيعرفني.  يعني نفسية جوات نفسية جوات نفسية متل الخسة الله وكيلك":

يعني بتقعد سنين مع ايا مرا منشان تجرب تفهم شو بدها شو هدفها بالحياة ما بتقدر تعرف يا اخي. طيب عال بتحبني او ما بتحبني. مزاج. شي بيقلب مع الدورة الشهرية يمكن. خس. كمية من الخس.

-          "كيف في طريقة بنت بدك منها شي شخصي. انت يعني شخصياً. بنت طالب منها شي. عرفت كيف. شي حميم يعني. حميم وسريع بدك ياه. لدرجة كانو طار الحميم وغط الحميم. عرفت كيف انت اكيد عرفت كيف. فكيف الطريقة تقنعها انو انت ما بدك منها شي. كيف؟ في طرق كتيرة هلق لا شك وكلها صدقني محكومة بالفشل. كلها تبقى كلها فكحنة وشارقة متل الشمس لا بل اوضح. كلها ملعلعة ومجرصة قد ما مكشوفة. لازم تبلفها والا بتخسرها. اذا فكرك تمرق قصتك معها هيدي بلا بلف عاساس انو اخلاق ما بتسمحلك بالبلف العوض بسلامتك يعني. طارت من ايدك. تبقى ليك يعني. تبقى زحلي الاخلاق شوي بهيك مناسبات خاصة انو انت اللي طالبو منها للبنت ما في شي من المواصفات المطلوبة للاخلاق. انو ما بدك تبلفها انتي اخلاقياً. انت ما بدك تبلفها. بس بدك تضاجعها انت. لا والله انا مني وعليي بلفها خيي ارحملها. واخلاقياً افضل":

ايه انو تبقى عاساس صديق وما بدك شي ابداً هيدا بالعلن وانت بالسر نلوي تلعن السفستك تبعها للبنت. ايه بلفها افضل. او عالاقل لغي هالاخلاق والصداقة من الموضوع.