غنية عاطفية 19: انسى سمر يا رشيد

يا رشيد،

المشكلة انو عم تعمم سمر مش وحدة. سمر انواع بس كل وحدة نفسيتا خسة جوات خسة عراية القائد زياد.

عندك سمر المحافظة. هاي اسوأ الانواع. بيكون في اعجاب متبادل بس الطريق مسكر لانو الله والدين والرسول والعدرا وبابا وماما وما شاكل وغير بلدان وقوميات واثنيات ما بتزبط. بدنا نفكر لقدام. العما، الله والوطن والعيلة، انتي بحزب الكتائب شي؟ عم يطلعلي سمرات بmini-jupes   بس دواعش عقلياً.

عندك سمر المنفتحة . هاي مش مشكل بالطريق. الطريق مفتوح بس الك ولغيرك حسب الاجواء. هاي مشكل. صايرة متل حسن صبرا بالشراع مين بيدفع اكتر منكتبلو.

عندك سمر العنيدة (مش امين الجميل) هاي بتبقى يمكن متفقين. بس في نكاية بتكون بالدم. بتفتش عايا شي معاكس لالك لتفاجمك. متل ما عمل مؤخرا سمير جعجع بالحريري. انو جايي عم تستلمني يا سعد وبدك تصاحب فرنجية. رح صاحب الجنرال.

عندك سمر المتسلطة. هاي ممكن تكون نسوية وجايي بهاللحظة تنتقم من كل الذكور بالعالم. بس الانتقام بالمطرح الغلط... بدا واحد طرطور. انو جبلي الجاط هلق وغسلي اجريي...

عندك سمر الضعيفة. هاي بدك تلاقي معا وسيلة لتحكي. احكي يا اختي. وتبقى بتندار من شي سمر تاني.

وعندك وعندك سمرات....

وانت جايي انت وكل رشيد متلك او متلنا مقدمين. والجنازة حامية والميت كلب. منافسة على ولا شي فعلياً.

سمر لجنة حكم بستار اكاديمي وسوبر ستار . وانت وغيرك بتجو بتقدمو. وحط شو بدك: شهايد، مصاري، فن، شعر ، ثقافة، شبوبية، تلفونات، سيارات . يعني متل انواع ستوديو الفن : اغنية شعبية، طرب، اغنية لبنانية، اغنية مصرية، عزف.....

حط شو بدك مشاعر ، رومانسيات، احاسيس، عواطف، كلام، .... برضو احيان ما بتقنع اللجنة. اللجنة احيان بتختار الاعطل. بناء على شو . الله واعلم. خبرات فنية.

مهما يكون جو المنافسة، مهما تقدم مؤهلات. ليك احيان الاختيار ما بيصير حسب المؤهلات . ممكن سمر تفضل الفقير على الغني او الغني على الفقير وبالحالتين عندا اسبابا الفنية....

انت ليش قاتل حالك عهالبرنامج. حضرو من البيت وضحاك . واذا ما عاجبك طفي التلفزيون لانو ما في غيرو. صدقني ما في شي بيستاهل.

هربت سمر يا رشيد

-          يا رفيق رشيد بس قبل ما نفوت بالحديث مقدمة بسيطة.

خيي انا عندي مرض مزمن :وجع بالمعدة، هيدا سببو بشكل رئيسي التعصيب يضاف عليه الاكل الهندي والكباب الحر والتدخين. وعادة بيصير في اضطرابات بالمعدة نتيجة التعصيب. لاقيت مع الوقت انو في حلين للموضوع: الحل الاول هوي الموسيقى وهيدا حل عابر، بتعزفلك ساعتين بتروق. بس الحل الاكثر جذرية كان الكتابة. الكتابة بتطلع فيها كل شي. بتصفي حسابات. بتطلع اشياء مش قادر تقولها. بعدين بترتاح المعدة.

انا عامة شاطر بالكتابة اكتر من الحكي. يمكن رهبة المواقف. الكتابة بتكتب عالرايق ما بتكون تحت ضغط وجود العامل البشري. ولما لا يتاح لالي التعبير كلاماً ساعتها بفضل الكتابة.

-          والله صحيح الحب مش قضية جدية كتير. انا كنت ما مصدقها متل ما كنت مصدق افلام الخيال العلمي تبع هوليوود.

ليك يا رشيد، انا زلمي كتير عقلاني بحسب لكل خطوة قبل ما اعملها مليون حساب وعادة بخلي عقلي يتحكم بكل خياراتي. منشان هيك في كتير تفاصيل راحت عليي بحياتي لاني بحكم عقلي قبل غريزتي. ويمكن منشان هيك زيادة علاقاتي محدودة ) يعني انك تكون انت وانسانة بفرد غرفة بالليل لوحدكون وما تعمل شي انطلاقاً من اخلاقك العالية مثلاً، هاي جرت عليي اتهامات بالمثلية. شفت الاخلاق بتطلع عاطلة  هالايام، وخاصة مع اي سمر بال Summer بلبنان).

 انا زلمي كتير عقلاني. بس هالمرة كان شي غريب، هالمرة (يمكن لاول مرة) خليت قلبي يقودني. علقت. عقولة الشيخ امام:

حب يعمل واد فكاكه

و يمشي حبه ف الزمالك

و القيامة و الفتاكة

يرموا طبعا ع المهالك

-          بهالوقت هيدا بيتغير كل شي. بتتغير تفاصيل نومك وتفاصيل حياتك. بيصير تفكيرك عم يحور ويدور حول سمر. شي مخيف رشيد. الحب مخيف رشيد. ما بتكون مفكر فيها هاي. انو شي لذيذ يابا. ايه لا منو كتير لذيذ. هيدا حب بعدك لا فكرت بزواج ولا بمسؤوليات متل ما عم تحكي انت. هيدي بدها دراسة عملية التعلق والحب، دراسة علمية من حضرتك. بعدين بدك تركزلي شوي عموضوع اللاوعي عند فرويد وكيفية تشكل الاحلام. هاي الشغلة عم تشغلني مؤخراً.

-          الحب مخيف. بتصير كل غنية، كل كلمة بغنية عم تسمعها، بتصير تعني شي. من "المزهرية" لعبادي الجوهر ل"بلاش معاندة" لسيد مكاوي. ومن "حن وانا حن" لياس خضر ل"يا بنت الناس" لعزيز مرقة (مع الفارق الفني طبعاً) وبتصير تختمها مع "مشكورة" لفؤاد سالم لاغاني اجنبية مثلاً Scars  ل Elegeion  .... الخ عقد ما في بمكتبتي الموسيقية اغاني.

-          وبطبيعة الحال واحد متلي بيكتب شعر. طبيعي يكتب قصايد. مع انو النساء هالايام ما بتتفاعل مع القصائد. في صبية قريتها قصيدة عيناك لنزار قباني وسمعتها ياها بصوت خالد الشيخ قال شو هالماساوية. او ممكن شو هالرومانسية. باي عصر عايش.

-          بعدين بيطلع انو الاخت سمر عندها مشاكل. ماشي الحال بسيطة. لا تلام. يمكن مرتبطة بحدا تاني او عندا مشاكل تانية شو بيعرفني. لا تلام. بس انو انا يابا شو جايي من اسكندينافيا وعم عاني من الرفاهية الزائدة.

-          احدى الصديقات الفايسبوكيات بتحطلي هالمقطع لمحمود درويش لتزيد الطين بلة:

هي لا تحبك انت

يعجبها مجازك

انت شاعرها

وهذا كل ما في الامر

-          ليس. صرت لاحظلك سمر عم تتهرب مني او تهرب مني. يابا كاني شي بعبع. يا خيي قسماً بالزهر والسنابل، ما باكل عالم انا. بس يا اخي خلص سمر بدها تهرب. سمر هربت. شو بقعد بلحقها.

-          خلي هالحكمة يللي كنت مفكرها اجنبية وسامعها بغنية  RAP . لمين بدك ياها تطلع لجبران خليل جبران. خلي هالحكمة تقود مش القلب:

“If you love somebody, let them go, for if they return, they were always yours. If they don't, they never were.”

 Khalil Gibran

رسالة عبر رشيد الى سمر

رشيد، 

فيني احكي مع "سمر" تاعولي، ورح سميها سمر ايضا َ حفاظاً على السرية المصرفية. معليش انت صدرك رحب. خليني عبر. 

انا كمان هزني هالمقطع يللي قريتو بمقالتك بس جزء منو بيمثلني.  

اسمعي يا سمر: " انا رجل مريض، انا انسان خبيث. لست املك شيئا مما يجذب او يفتن..."

انا كمان يا سمر عندي كتير افكار متل رشيد. بس ما بقدر عبر عنها احيان كلامياً وخاصة اذا كنت مباشرة امام فتاة بهالجمال. فجأة هيك بيتبخر كل الشعر والادب والرواية. بتعرفي شو يعني "بتبلكم" . ايه هيك بيصير. 

هلق انا خجول بطبعي ويمكن مصطلح المرض و الخبث اللي اقتبسنا عن الاخ رشيد ما كتير مناسب لوصف حالتي انو الخجل والخبث والمرض ما بيركبوا مع بعضون. بس فيها جزء من مرض الخجل وخبثنة الخجل. هيك بدك تفهميهون. 

انا عم اقرا اشياء منقالة بتعبر عن حالتي بشعر الماغوط مثلاً. في اعظم منو للماغوط. اسمعي هالمقطع: 

أيها الربيعُ المقبلُ من عينيها

أيها الكناري المسافرُ في ضوء القمر

خذني إليها

قصيدةَ غرامٍ أو طعنةَ خنجر

فأنا متشرّد وجريح

أحبُّ المطر وأنين الأمواج البعيده

من أعماق النوم أستيقظ

لأفكر بركبة امرأة شهيةٍ رأيتها ذات يوم

لأعاقرَ الخمرة وأقرضَ الشعر

قل لحبيبتي ليلى

ذاتِ الفم السكران والقدمين الحريريتين

أنني مريضٌ ومشتاقٌ إليها

انني ألمح آثار أقدام على قلبي . اذا عجبك كملي هون

هاي الرومانسية مشكلة كمان منا هينة. شب رومانسي يا سمر بدك تلاقي حل. 

وانا (اعوذ بالله من كلمة انا - بس مضطرين نستخدمها هون). انا يا سمر متل خيي رشيد تمام كمان ما كتير بحب العالم بشكل عام. وفيني اعطي امثلة عديدة عكره العالم. ايا واحد مهووس باي تلفون ذكي بالعالم هيدا بيزعجني، وايا واحد بيضحك عنكت المدير وبيمسح جوخ المدير ، وايا واحد اساساً ما بيرد المرحبا. وايا واحد بتكون بتعرفو وقاعد معو وبتشوفو مرة تانية بيعمل حالو مش عارفك والانكى انو عارفك وهاي اكتر شي مزعجة مع الرفاق صراحة، ايا واحد بيقلك خيي وحبيبي وخيي الاصلي وبيكون عم يخيطلك خوازيق، وايا وحدة ضاربة حالها بسرماية عتيقة، و كتير ناس غيرون. بلا ما نعد. 

شايفة يا سمر لو طبعي عدائي شوي، لو مني صعلوك ايه كنت فتكت بسما ربون واحد واحد متل رشيد بالمسرحية. والله كنت سكرت السير بالحمرا. بس انا يا سمر صعلوك وهاي نقطة ما كتير جذابة. تخيلي زعران الشارع عم ينمرو عليكي وانا عم اتصعلك شو بيكون موقفك؟ 

وايضاً يا اخت سمر عندي كمان رغبة فظيعة بالوحدة متل رشيد. بفضل كتير الوحدة. انا صرلي فترة اكتر من رشيد صرلي حوالى ال 10 سنين تقريباً لوحدي (على الاقل بغرفة لوحدي). صاير بس اقعد مع عالم انزعج. ومحاولات القعدة مع ناس مقربين واصدقاء وصلت لخلافات وسوء تفاهمات بدا وقت للانسان يصلحها. آخر شي بحط مريم صالح وبقعد بسمع: 

وسمر يمكن انتي كمان كتير اجتماعية وانا كتير فردي. هيدي الشغلة بدا وقت لتنحل. وانا من النوع يللي بدي فترة تكون صداقة. مني ونس بالعربي المشبرح. وانا ما بضحك غير للناس الموثوقين - هودي في بيني وبينن رغيف سخن. 

هلق رشيد بت الموضوع انو ما في امل خالص بالنسبة لالو. انا مخلي حبل امل بس انو بدنا نحل كل هالقصص الآنفة الذكر. اذا قدرنا حليناها كان به والا فلا حول ولا قوة الا بالله والصلاة والسلام على نبي المرسلين وخاتم النبيين. آمين. 

عينات يا رشيد

يا رفيق رشيد صلي عالنبي.
بشرفك ما تدوخنا. بدك تحكي حكي علمي مش غلط. بلتقي انا وياك عمركز الحركة الاجتماعية عبدارو ومنحكي. بس خلينا نتطلع شوي. خدلك هالعينات من المجتمع:
جيسي طالعة من "سكاي بار" الساعة 4 وج الصبح مسربة عبيتها، ريحة ال "جاك دانييلز" فاحة منها والعرق عم يزرزب عقد الرقص من الشورت (يللي اشبه بالكيلوت). هيدي بشو بدك تحكيها بالمادية الجدلية. 

ابو قاسم عم يشرب متة عالبرندا بالجبل ومامن عحياتو مع وليد بيك عاساس انو ما في حدا بيحمي غير البيك. كيف بدك تقنعو انو في شركات تأمين عالحياة غير البيك "سنا" يا اخي. وطبعاً ما رح تجي تحكي عن الاشتراكية العلمية لانو هوي بيعرف بس الاشتراكية الجنبلاطية.
احمد نازل من باب التبانة بباص الاحدب (وعايف اخلاقو)عالزايتوناي باي (عنجد اسمها عبري عراية السلام لاسمو زياد) بيشتغل عالليناز تحت. كان مقتنع انو الشيخ سعد هوي اقوى واحد بس هلق صار يحبو لداعي الاسلام الشهال لانو اقوى. مشغل فضل شاكر "سوف نبقى هنا" . بدك تقنعو انت اكتر من سالم الرافعي انو نظرية التطور الطبيعي تبع داروين صحيحة.
ام علي راجعة من حقل الحشيش ببعلبك يللي كانت القوى الامنية عم تتلفو وبتحلف وحياة السيد. مع انو يبدو من اجتماع بري مع فعاليات بقاعية انو عم يرفع ايدو عنون وصار بدو تدخل الدولة عالبقاع. شو السبب بهاللحظة بالذات. الله اعلم. 20 سنة عم يحكو عن التنمية وما طبقوها مع انو حركة امل بالحكومة من 20 سنة وحزب الله من 7 سنين . طيب وين التنمية. بشو بدك تحكيها لام علي بصراع الطبقات. 

" ثلاث اشارات استفهام (عراية ابن عمنا توفيق بو قعقور) انت ملاحظ التلازم بين زراعة الحشيش والحركات الاسلامية. افغانستان اكبر بلد مصدر للافيون بالعالم 90% اذا مش غلطان. ونفس الشي عنا. ما بعرف يمكن الافيون بيحن عبعضو . افيون الدين والافيون الحقيقي. فاصلة منقوطة"
منرجع. هاي عينات يا رفيق من المجتمع يللي نحنا فيه. انت هلق ببرلين. انا I haven't been in Berlin . وشايف كل هودي.
انا وياك فينا نحكي كتير بداروين وماركس ونيتشه و العظم وابو زيد والجابري وطرابيشي وغيرون كتير. بس هودي الجماعة ما فيك تحكيهون هيك. اساساً يمكن بعض رفاقنا ما فيك تحكيهون هك لانو بيغب عقلبون كمان.
يمكن منشان هيك صار عمرنا 88. بس بعدنا عم نجهد ببعض الاعتصامات لنلم 88 رفيق يشاركو. 88 رشيد تيسكرو السير بالحمرا. ما عم يسكر السير. فبدل ما يسكرو السير بيروحوا هني يسكروا بال"ة" مربوطة .
انا معك يا رفيق انو نحنا عنا النظرية وعنا المنطق ومعنا الحق. ومش انا بس مقتنع هيك هني هودي الناس بجزء منون بيبصمولك انو انت معك حق. بس رغم هيدا وكلو في ثغرة ما في مكان ما ما عم نقدر ننفذ منها لهالناس. هون لازم الشغل يصير. خطابنا ممتاز ونظرياتنا ممتازة وكل شي ممتاز بس حبل التواصل مقطوع.
يا ريت اذا فيك انت او حدا من الرفاق يساعدنا بهالموضوع.

نط فيليكس يا رشيد

نط فيليكس يا رشيد. 

نط فيليكس وكسر شي 6-7 ارقام قياسية وانو شايف حالو وناسي انو نحنا مكسرين ارقام قياسية بالتبولة والحمص والفلافل. يروح يشوف كتاب غينيس. 

نط من السماء على الارض ونحنا عم ننط من القرن الواحد والعشرين على ايام قريش بمساعدة براءة المسمين وفاتح 1453. 

نط فيليكس بعد دراسة 7 سنوات ليعمل تجربة. ليك شو بهلة. ب 7 سنين نحنا منعمل العمايل نحنا منعمل حروب وقتال. فاضيين للتجارب. في صراع سني- شيعي. او متل ما قال مظفر النواب (قدس الله سره) : "اقتتلوا بسيوف السنة والشيعة والعلويين بل والمنقرضين ايضاَ. 

نط فيليكس بسرعة خارقة. ولا فيليكس نحنا مننط من الجبل على البحر بنص ساعة. بس لوما العجقة عم تبعصنا عالدورة والصياد والرحاب. 

نط فيليكس واخترق جدار الصوت. نحنا يومية في طائرات اسرائيلية عم تخترق جدار الصوت وتخترق السماء. بس مؤخراً بعتنا ايوب تيخترق. 

نط فيليكس عن ارتفاع 128 الف قدم. ونحنا عنا 128 واحد يومية بيلبطونا اكتر من الف قدم. يعني نحنا اعلى من ارتفاع 128 الف قدم. 

نط فيليكس مفكر حالو اول واحد بيعمل قفزة حرة. ونحنا عنا شي 4-5 صاروا ناطين عن صخرة الروشة بعد يأسون من البلد. 

نط فيليكس وانجلقوا عالفايسبوك وتويتر. يا ريتوا ما نط قديش كان وفر علينا بوستات وكلمات.

نط فيليكس يا رشيد.