"طلع القمر".
طلت فيروز . و"حليت ليالي السهر".
طلع "القمر اللي بيضوي عالناس".
وطلت فيروز.
طلت فيروز. "مستنا بالخير".
طلت فيروز . بفستانها الابيض الو "عقدة
زغيورة والكشكش طاير"
طلت فيروز بعد ما نطرتنا كتير. بعد ما كانت
"عايشة وحدها بلانا" .
طلت فيروز . سألتنا "لوبن رايحين"
. رايحين نحضر فيروز.
كانت فيروز تغني "تعا ولا تجي" .
بس هالمرة اجت فيروز.
اجت فيروز . لقيت "اهل هواها ما
غيروا".
اجت فيروز "مضوية بالعز وبالاشعار"
اجت فيروز قبل الميلاد . ب "ليلة
عيد".
اجت "زارتنا ببيوتنا" وغنت ليسوع.
اجت فيروز والدنيا "تلج تلج"
وزمهرير.
اجت فيروز رجعتنا" ولاد زغار على سطح
الجيران".
اجت فيروز وجمعت لبنانيين وعرب . اجوا من
"جسر اللوزية" ومن "المراكب عالمينا" .
اجت فيروز سألتنا ان كنا "فايقين ولا
ناسيين"؟ كيف ممكن ننسى ونحنا "صباح ومسا" عم نسمع فيروز.
اجت فيروز وحركت كل الاشجان . ب"دوارة
عالدوارة" و"ليش البكي" :البكي عبلاد عم تحترق.
اجت فيروز "حاملة بلادها بايديها"
. وحاملة دف بايدها. وغنت زجل "ان ما سهرنا ببيروت منسهر بالشام" .
الشام اللي عم تحترق. ورغم كل الحرايق بيضل "في امل" خاصة مع صوت فيروز.
طلت فيروز واجت فيروز وغنت فيروز
برغم كل الحرايق
وبرغم بورجوازية المسرح
وبرغم غلا اسعار اليطاقات
وبرغم القمع الاعلامي و تصرفات ريما
وبرغم غياب زياد يللي كتير اشتقنا لوجودو عالمسرح مع فيروز
وبرغم برنامج الحفل يللي تضمن كتير اشياء
قديمة ومش معروفة كتير.
برغم كل شي و"حبيتو ما حبيتو" حضرت
فيروز.
احسان المصري
ليست هناك تعليقات:
إرسال تعليق