الصورة سودا متل الليل متل بعض الاعلام يللي عم تنرفع بالساحات
والثورة بتكون حمرا علون دم العمال واعلامون.
ثورة من دون مضمون طبقي ؟ ثورة من دون حزب شيوعي قائدها ؟ لوين بدها تودي؟
وين الاحزاب الشيوعية بالعالم العربي ؟ وليش ما عم تستغل هاللحظة التاريخية؟ لانو هاللحظة التاريخية على ما يبدو مش للشيوعيين . يبدو انها للاسلاميين و الجيش واميركا من وراهون.
ما بدي انفهم غلط . انا من الناس يللي مع كل هالثورات لنشوف لوين بدها تودي . ثورات محقة ضد انظمة فاسدة سواء معتدلة او ممانعة .عم تطالب بالحرية مع اغفال كبير للوضع الطبقي.
بس خلينا نوقف للحظة ونتمعن بيللي صار .
بالبداية من تونس - تونس البوعزيزي مشعل الثورات ومطرح ما الصورة بعدها ابهى شي. قدرو اخواننا بتونس انو يزيحو الطاغية ومكملين باذن دم البوعزيزي عكل بقايا نظامو . وبتونس رغم محاولات حزب النهضة فالتونسيين حذرين وبعتقد بيهمون يحافظو على الطابع العلماني للدولة يلي ارساه بورقيبة . ووجود احزاب راديكالية متل حزب العمال الشيوعي التونسي بقيادة الرفيق المناضل حمة الهمامي بيعطي امل . اذن بتونس في امل ...
بمصر الصورة بتبلش تبهت شوي . قدرت ثورة 25 يناير انو تزيح الديكتاتور العميل الصهيوني وقدرت تجرو على المحاكمة وهيدا انجاز ما بعدو انجاز . بس بمصر في تخوفات .
في تخوف من السلفيين والاخوان المسلمين يللي هني اكتر شي منظمين ومهيئين وبرزت قدرتون بموضوع الاستفتاء . لبطوا بالارض ليحافظو عالشريعة مصدر الدستور. وهدموا كنيسة . وقطعوا اذن مواطن قبطي لانو اتهم بالتحرش وتبين انو بريء. ورفضوا تعيين محافظ قبطي بقنا. وعم يطالبوا بفرض النقاب. يعني سالي زهران الطاهرة ممكن تبطل شهيدة بعرف السلفيين ....
وفي تخوف من الجيش يللي مصدر تدريبو اميركا ويللي اعلن عن ابقاء المعاهدات يعني بصريح العبارة كامب دايفيد ما رح تنمس .
وفي تخوف من الانتهازيين . البرادعي او موسى او غيرون معروف مين هني . ويا حدا منون يا حدا من الاخوان رح يكون رئيس مصر المقبل. وفي مصطفى الفقي رجل نظام مبارك يللي يبدو رح يخلف موسى برئاسة الجامعة العربية بتغطية من السعوديين .
ولما نوصل عاليمن بتصير الصورة سودا شوي اكتر . منشوف انو صالح يللي صار على وشك الرحيل بعدو عم يعاند بس ايامو معدودة ويبدو انو رح يكون الرقم 3 بعد بن علي ومبارك. بس رغم اعلام غيفارا يللي عم تنرفع بتعز وعدن ما كتير الوضع بيطمن . بالنهاية اليمن قبائل والحزب الشيوعي الوحيد يللي حكم بالعالم العربي يللي هوي الحزب الاشتراكي اليمني بآخر حكمو خلص على خلاف قبلي ومجازر . ويبدو انو في لعبة سعودية للمحافظة على النظام باليمن الخاصرة الجنوبية لنظام السعودية . فرح يكون الحكم لعلي محسن الاحمر الضابط يللي انشق مؤخراً عن النظام والقريب من السلفيين مع حزب الاصلاح يللي هوي خليط من القبائليين من آل الاحمر والسلفيين بقيادة الزنداني (القريب من القاعدة ). يعني جيش واسلاميين شي بيشبه الوضع المصري المنسوخ عن الوضع التركي. و ما بدنا ننسى التخوف الجدي من اعادة التقسيم ليمنين او ثلاثة جنوب وشمال و ممكن حوثيين.
ولما نوصل عالبحرين الصورة بتصير لونا سودا . ثورة شعب البحرين قمعت من قوات درع الخليج. الثورة يللي حولوها لصراع مذهبي سني – شيعي ولصراع اقليمي سعودي-ايراني. ورغم وجود بعض الاحزاب العلمانية متل المنبر الديموقراطي و وعد (يللي على فكرة رئيسو سني ومعتقل من قبل النظام مما يثبت الطابع غير المذهبي لثورة البحرين) فالغلبة واضحة للتيارات الشيعية سواء الوفاق (يللي بينت بوثائق ويكيليكس اتصالاتها باميركا و اقرب لمرجعية السيستاني من قم) او حق (يللي بتمثل التيار المتشدد الاكثر ارتباطاً بايران). منشان هيك استفحل الصراع مذهبياً واجو الوهابيين من السعودية عالبحرين منشان يضربو "اولاد المتعة" (متل ما عم يسمو الاخوان الشيعة). منشان هيك الصورة بتبلش تسود.
وبس نحكي عن ليبيا منكون عم نحكي عن صورة اكثر اسوداداً . الشعب الليبي يللي واجه بصدورو العارية نظام المعتوه القذافي يللي ارتكب مجازر شنيعة جداً ويللي حول الثورة لحرب اهلية دموية ويللي استدرج قوات الناتو للتدخل نتيجة ممارساتو. بعدو المجنون صامد ويبدو الغرب راضي بالنهاية مش مهم لا الشهداء ولا بقاء القذافي . المهم النفط. والدلائل بتشير لحرب اهلية قد تستمر ستة اشهر او اكثر قد تتضمن تدخل بري لقوات الناتو يعني عراق وافغانستان من جديد. والمعارضة الليبية ما كتير بتبشر بالخير . بالنهاية كلون منشقين عن النظام ومرتبطين بقطر والسعودية واميركا وفرنسا . واليسار غائب تماماً عن الصورة. اساساً ما بعتقد انو في يسار بليبيا . وبعد 40 سنة من حكم الديكتاتور الشعب الليبي فاقد للوعي السياسي. ثورة بتستقبل جون ماكاين شو منتظرين منها. ويا خوفي من تقسيم ليبيا شرق وغرب. وعلى فكرة رغم بهلنة علم القذافي الاخضر فعلم الثورة هو علم الملكية السنوسية ويللي ما بيعرف الملكية يرجع لمقالة زياد منى بالسفير من اسبوع.
ورح اختم بسوريا. صحيح حكم البعث الديكتاتوري آيل الى زوال متلو متل غيرو من الانظمة يللي انذكرت سابقاً. بس للاسف ما في كتير بوادر بتطمن. ورغم بعض الوجود اليساري لحزب العمل الشيوعي وبعض المثقفين فما بعتقد تاثيرون رح يكون كبير. شفنا انو بعض المطالب الاولى يللي نفذها النظام كانت مطالب سلفية مثل اعادة المنقبات للمدارس مثلاً (امبسط فيها البوطي شيخ النظام). بس الوضع السوري حساس مذهبياً. شفنا شيخ درعا عم يوصف الدرزيات بالعاهرات وشفنا بعض المظاهر الشبيهة بالساحل السوري مطرح ما سهل تحويل الفتنة سنية – علوية. وشفنا مرشد الاخوان (ملا شقفة) عم يحكي من السعودية. ومنعرف دور خدام ورفعت الاسد. شو متخيلين انو يجي ميشال كيلو رئيس بعد بشار. لا يا رفاق. مثل مصر رح يكون الوضع اذا مش اسوأ.
اما بالبلدان الثانية
فالسودان مشغول هلق بالتقسيم
والعراق مشغول بالتقسيم الجايي والاحتلال الباقي
و بفلسطين مشغولين السلفيين (اولاد حماس) بتشويه تاريخ النضال وبقتل جوليانو مير خميس وفيتوريو اريغوني والسلطة مشغولة بنص دولة
و بالاردن تعرض شباب 24 آذار لقمع الملك مع انو ما في ثورة بتطالب ببقاء الملك (الله قالا) بس هيدي حساسية الخلاف الفلسطيني – الاردني وشفنا السلفيين عم بيلوحوا بالخناجر
وبلبنان ناطرين نحنا وحزب التحرير لتفرج بباقي البلدان حتى تتشكل حكومة والمحكمة يبدو كمان ناطرة معنا. طيب معقول انو المحكمة تتهم سوريا ويطير النظام مش حلوة بحق محكمة نزيهة ( كيفا نزيهة؟ سلمولي عليها كتير). والرفاق تبع اسقاط النظام وقفو هلق بعد ما تبين انو ما حدا بدو اسقاط النظام غير الحزب الشيوعي بس بعدها اللحظة التاريخية ما اجت. وتعا ولا تجي
فخلينا ننطر اللحظة التاريخية لتجي. وهيدي اللحظة خطفوها من تحت خيمة مجدليا. ويللي خطفوها مش الغجر . هالمرة خطفوها وقطفوها الاسلاميين والسلفيين والوهابيين والليبراليين والجيوش و اميركا واسرائيل والسعودية. كاسك يا وطن ...
احسان المصري
ليست هناك تعليقات:
إرسال تعليق