عينات يا رشيد

يا رفيق رشيد صلي عالنبي.
بشرفك ما تدوخنا. بدك تحكي حكي علمي مش غلط. بلتقي انا وياك عمركز الحركة الاجتماعية عبدارو ومنحكي. بس خلينا نتطلع شوي. خدلك هالعينات من المجتمع:
جيسي طالعة من "سكاي بار" الساعة 4 وج الصبح مسربة عبيتها، ريحة ال "جاك دانييلز" فاحة منها والعرق عم يزرزب عقد الرقص من الشورت (يللي اشبه بالكيلوت). هيدي بشو بدك تحكيها بالمادية الجدلية. 

ابو قاسم عم يشرب متة عالبرندا بالجبل ومامن عحياتو مع وليد بيك عاساس انو ما في حدا بيحمي غير البيك. كيف بدك تقنعو انو في شركات تأمين عالحياة غير البيك "سنا" يا اخي. وطبعاً ما رح تجي تحكي عن الاشتراكية العلمية لانو هوي بيعرف بس الاشتراكية الجنبلاطية.
احمد نازل من باب التبانة بباص الاحدب (وعايف اخلاقو)عالزايتوناي باي (عنجد اسمها عبري عراية السلام لاسمو زياد) بيشتغل عالليناز تحت. كان مقتنع انو الشيخ سعد هوي اقوى واحد بس هلق صار يحبو لداعي الاسلام الشهال لانو اقوى. مشغل فضل شاكر "سوف نبقى هنا" . بدك تقنعو انت اكتر من سالم الرافعي انو نظرية التطور الطبيعي تبع داروين صحيحة.
ام علي راجعة من حقل الحشيش ببعلبك يللي كانت القوى الامنية عم تتلفو وبتحلف وحياة السيد. مع انو يبدو من اجتماع بري مع فعاليات بقاعية انو عم يرفع ايدو عنون وصار بدو تدخل الدولة عالبقاع. شو السبب بهاللحظة بالذات. الله اعلم. 20 سنة عم يحكو عن التنمية وما طبقوها مع انو حركة امل بالحكومة من 20 سنة وحزب الله من 7 سنين . طيب وين التنمية. بشو بدك تحكيها لام علي بصراع الطبقات. 

" ثلاث اشارات استفهام (عراية ابن عمنا توفيق بو قعقور) انت ملاحظ التلازم بين زراعة الحشيش والحركات الاسلامية. افغانستان اكبر بلد مصدر للافيون بالعالم 90% اذا مش غلطان. ونفس الشي عنا. ما بعرف يمكن الافيون بيحن عبعضو . افيون الدين والافيون الحقيقي. فاصلة منقوطة"
منرجع. هاي عينات يا رفيق من المجتمع يللي نحنا فيه. انت هلق ببرلين. انا I haven't been in Berlin . وشايف كل هودي.
انا وياك فينا نحكي كتير بداروين وماركس ونيتشه و العظم وابو زيد والجابري وطرابيشي وغيرون كتير. بس هودي الجماعة ما فيك تحكيهون هيك. اساساً يمكن بعض رفاقنا ما فيك تحكيهون هك لانو بيغب عقلبون كمان.
يمكن منشان هيك صار عمرنا 88. بس بعدنا عم نجهد ببعض الاعتصامات لنلم 88 رفيق يشاركو. 88 رشيد تيسكرو السير بالحمرا. ما عم يسكر السير. فبدل ما يسكرو السير بيروحوا هني يسكروا بال"ة" مربوطة .
انا معك يا رفيق انو نحنا عنا النظرية وعنا المنطق ومعنا الحق. ومش انا بس مقتنع هيك هني هودي الناس بجزء منون بيبصمولك انو انت معك حق. بس رغم هيدا وكلو في ثغرة ما في مكان ما ما عم نقدر ننفذ منها لهالناس. هون لازم الشغل يصير. خطابنا ممتاز ونظرياتنا ممتازة وكل شي ممتاز بس حبل التواصل مقطوع.
يا ريت اذا فيك انت او حدا من الرفاق يساعدنا بهالموضوع.