مهداة الى شهداء معارك عين الصفصاف و عين الميدان والكرخانة
- خلي بالك من زوزو
وخلي زوزو من بالك
رح خبرك يابني القصة
اللي الفتها كرمالك
- زوزو شب عنا من الحي
جدو كان مقاطعجي
عندو اراضي وعندو نفوذ
الدولة علي ما بتسترجي
- عمر لابنو قصرين
واشترى فيلا ببيروت
وفتحلو شي شركتين
عالماشي قبل ما يموت
- وبو زوزو زلمي محنك
حافظلو على الثروة
وصار يوسع اشغالو
ويتقدم خطوة خطوة
- يسرقلو شوي من هون
لحتى يزيدو الفلوس
و من هون يزور الزعيم
وليزبط ايدو بيبوس
- ربي زوزو بهيدا الجو
وربينا نحنا حدو
كنا نلعب غميضة
بالدار عند بيت جدو
- وكبرنا وصرنا شباب
وكل واحد صار عندو رفيق
زوزو بيركب احلى جيب
ونحنا منمشي عالطريق
- وزوزو بجامعات الخاصة
ونحنا انجق رسمية
شهريتو بتلحق مليون
ونحنا ما منلحق مية
- وصار يمرق زوزو بالحي
وبطل يتعاطى معنا
يعبي السيارة بنات
ونحنا ما بيطلعنا
- ونحنا ناس معترين
بياكل عشانا البسين
مقضيينا درس وشغل
حتى نامن شي قرشين
- شو بدنا بزوزو وبيو
نحنا رضينا بهالعيشة
لا سرقنا من بيوت الناس
ولا تاجرنا بحشيشة
- حتى لو متنا من الجوع
بيكفي عشنا بكرامي
منموت وراسنا مرفوع
وطز بزوزو الحرامي
ليست هناك تعليقات:
إرسال تعليق