- كيف كنت مصدقك يا وطن يا كذبة
افنيت عمري وشمعي عم يدوب
مشيت ما لقيت غير شوك بدربي
ومجتمع فارغ مليان بالعيوب
شو حلمت بالتغيير و غلطت يا ربي
بعدني لهلق عم صلي وصوم وتوب
قلت حرية قالوا هاي مسبة
ما عاد يشفعلي لا علي و لا يعقوب
عفت التبولة وبضهرها الكبة
والكذب والدجل والبغض بالقلوب
حملت شي مية نكسة ونكبة
وهربت ما في غير الهروب
بطلب منك عذر يا محبة
ومن كل شهيد بارض الجنوب
بس هيك مرتاح بهالغربة
متل ناسك قاعد بهالشخروب
بغرفة متل عرزال فيها شو مخبي
اشعار واوجاع وضحكات وذنوب
قاعد ومرتاح لا هم عقلبي
ناسي البلد اللي ما جاب غير حروب
عامل حالي بلد ومجلسي الحربي
بعقدو كل ما تميل الشمس عالغروب
بفضي اول كاس التاني بعبي
بحرق بسيجارتي الوراق والمكتوب .
ليست هناك تعليقات:
إرسال تعليق