مش طبيعي

-          مش طبيعي

لا يا رفيق رشيد . يا ملك الساحة اللبنانية على بياض . مش طبيعي .

-          مش طبيعي انو بعد كل ثورة مصر ينط المجلس العسكري على الحكم ويربحنا طنطاوي جميلة انو هوي "كان مقاتل وهيفضل مقاتل" متل ما حكا قبلو مبارك.

-          مش طبيعي انو تنط الدبابات على اجساد المتظاهرين الاقباط. صحيح انو حركتون دينية بس هني مغبونين تاريخياً. وعم تنحرق كنايسون.

-          مش طبيعي انو الدولة بمصر تكون متحالفة مع السلفيين.

-          ومش طبيعي عسيرة السلفيين انو شو هالمخلوقات هيدي. كيف عايشين بالقرن 21. بس عايشين وعم يطلعوا عاليوتيوب. انو الوهابي على اليوتيوب. الله قالا. عرعرور على الآي باد . ولا الله. تعا شيلني.

-          ومش طبيعي انو يكونوا منتشرين السلفيين. طيب مصر منيح هيي منبع الحركات الاسلامية  بس انو بتونس صاحبة التراث العلماني مش طبيعية كتير.

-          مش طبيعي انو بتونس يتعدوا على قناة اذاعية لانوعرضت بيرسيبوليس للمخرجة الايرانية مرجان ساترابي. انو في مس بالذات الالهية. مع انو الفيلم في نقد لنظام الملالي الشيعي العدو التاريخي للسلفيين. ومش طبيعي انو قبلها يتعدو على مسرح لانو عرض فيلم اسمو "لا الهي ولا سيدي" للمخرجة التونسية نادية الفاني.

-          ومش طبيعي انو الاحصاءات بتقول انو حركة النهضة رح تربح بتونس. طبعاً الغنوشي عاطي تطمينات لاميركا واوروبا قبل انو رح يكون متل اردوغان.

-          ومش طبيعي انو رغم انو هالجماعة المذكورين آنفاً اقوياء بكل المنطقة انو نضلنا تحت رحمة بن علي ومبارك. خدلك علقنا بين المطرقة والسندان.

-          مش طبيعي انو ننطر بشار ليعمل اصلاحاتو بعدما يقتل كل الشعب السوري لانو خايفين من العرعور.

-          مش طبيعي بشار ما الذو.والالذ مؤيدينو تبع الممانعة. قال عصابات مسلحة. طيب ليه العصابات المسلحة ما بتقوص عتظاهرات تاييد النظام. انو هودي اعدائون. عصابات مسلحة متحالفة مع المعارضة وبتقوص عليها بس ما بتقوص عاعدائها مؤيدي النظام. سبحان الله.

-          مش طبيعي انو ننطر بشار وهوي رح يفل.  ما في شي بيضلو كلو بيفل. صحيح انو صار في آية بعثية "لا اله الا بشار". بس هالاله رح يموت.

-          ومش طبيعي انو بعد ما يفل رح يجو الاسلاميين بس هيك الشعب بدو. فبعد ما يفل رح يكون نضالنا طويل ضد هالرجعية اذا اجت. هيي والغرب.

-          مش طبيعي الغرب. قليلة اميركا يا رجل. انو الها دور بكل شي. طيب ما هيدا شغلها. شغلها تحرك قطر وتركيا واسرائيل والسعودية.

-          ومش طبيعي عسيرة السعودية وعطفاً على موضوع السلفيين انو معقولة هودي لولا من اميركا كيف مكفيين. بناية بالقرن 21 وعقل بالقرن 1 هجري. طيب المرأة ممنوع تسوق والشيعة ممنوع يحكو حتى لو بالبحرين.

-          ومش طبيعي عسيرة البحرين انو تكون ضد هالثورة او انو تكون مع هالثورة وضد باقي الثورات. بتصير مذهبي كتير. عطريقة حزب الله بيحبو لاحمد الجلبي و خالد مشعل بنفس الوقت.

-          مش طبيعي عسيرة خالد مشعل هالصفقة تبع الاسرى كيف ركبوها. طيب منيحة يطلع الف. بس عنا بعد احمد سعدات ومروان البرغوثي وغيرون يابا.

-          و مش طبيعي عسيرة الاسرى انو ننسى فلسطين. انو فلسطين ما رح ننساها قد ما يجربو يعملو . هني والمناضل محمود عباس يللي ما قشعوا بالغرب. قليل الغرب.

-          مش طبيعي الغرب. يا خيي .بيقشع متل ما بدو. مش شايف غير ليبيا عحجة البترول. و لحقوا القذافي.

-          مش طبيعي القذافي. هيدا قمة المش طبيعية. هلق بعدني مخبي بقلبي. عم يدوروا عليه يا خيي.

-          مش طبيعي عسيرة القذافي انو حركة امل بعدون ناطرينو لموسى الصدر. يا اخي اذا بعدوا طيب بيكون صار عمرو 100 سنة. هيدا عاساس انو القذافي حنون وخبا عندو تيظهر بعدين متل المهدي. ما بتعرف يمكن يكونوا اخدوا معو عقلوب الملايين. يا نبيه حاجي ناطرينو. عضامو بتكون صارت مكاحل.

-          مش طبيعي عسيرة نبيه الزعما اللبنانيي ما الذون . وليد جنبلاط قوص بس اطيح مبارك. يا اخي مبارك ديكتاتور صرلو من 83 رئيس. طيب يا بيك ما صرلك من ال 77 عرأس الحزب يللي كان حزب خليتو يصير طايفة.

-          مش طبيعي الطوائف ما الذها. خيي كل واحد ينتخب طايفتو. واذا مش زابطة بيزبطها مروان شربل بالداخلية.

-          مش طبيعي عسيرة شربل غير ما نحيي شربل نحاس. هيدا مش طبيعي المطرح يللي حاطينو في. عم يطاحش بس شو بدو يطلع بايدو بوج المافيات. وسعد مهددو من قبل.

-          مش طبيعي . سعد وينو. هيدا رئيس تيار طويل عريض. خلص ترك كل شي وتفرغ للشركة. في مصاري بالدق. خلي ميقاتي يحكم.

-          مش طبيعي عسيرة ميقاتي انو كيف هالنظرية هيدي. انو اللي بيقبضوا فوق ال مليون وتمانمية الف هودي ولاد الجارية يعني. بس شو بدك تحكي انو غسان غصن ولا بسام طليس. ما في عمال اخي.

-          مش طبيعي عسيرة العمال انو وين الشيوعيية. وين هالحفنة الساكتة. تحركوا يا اخي. والله جميل بالخربة معو حق من عشرين سنة مش آخدين موقف.

-          اخيراً مش طبيعي انو يكون في شيوعية مع ايا واحد من يللي انذكروا فوق. هيدا اكتر شي مش طبيعي.

ومش طبيعي انو يكونوا الشيوعية عم يختلفوا على تأييد ايا واحد من يللي انذكروا فوق.  لازم تكون ضدون كلون. سعيدة يابا ودعوس.

-          مش طبيعي لازم نلتم . هالحفنة . ننزل نوقف السير بالحمرا وبكل لبنان والعالم العربي.

والله مش طبيعي (مقصودة خيي رشيد وفهمك كفاية).

احسان

استشهادك غيفارا

ذكرى استشهاد المناضل الاممي الكبير ارنستو تشي غيفارا 9 اكتوبر 1967 

غنية عاطفية 5 : الى فتاة دمشقية

-          تشرق ابتسامتك فاغني: "يسعد صباحك سوريا صبحك حلو، عاشق انا وعشق الوطن ما اجملو"، اغني لنيسان، اغني لربيع دمشقي يزهو بالحرية.

اغني لعينيك الفاتنتين وفيهما براءة حمزة الخطيب.

اغني لك كما غنت الطريق والطريق اليك طويل طويل كدرب النضال مع العمال والفلاحين. اغني لك: "يا ابهج ما غنى به الغابرون، اسمك يا دمشق، يا اجمل ما ترسمه العيون، وجهك يا دمشق".

اغني لك صامتاً فحنجرتي مقتلعة كابراهيم القاشوش. 

-          كم كنت اود ان ارسمك ايضاً لكن اصابعي مهشمة كعلي فرزات.

كم كنت اود ان اعزف لك على الغيتار لكن اظافري اقتلعت كاطفال درعا.

-          كم كنت اود ان اباشر اصلاحاتي ولكني سيدتي كبشار الاسد واصلاحاتي صعبة وتحتاج للجان ومهل زمنية طويلة. ثم لا يعقل ان اتملك الجرأة هكذا فجأة فهي كالحرية بحاجة الى تدريبات خاصة قد يتخللها قتل لابرياء في الشوارع. فلا تقولي "يا حيف".

-          اعلنت الثورات في ارجاء العالم العربي كله. وثورتي لم اعلنها بعد. كلما حاولت فشلت تماماً كحملة اسقاط النظام الطائفي في لبنان. لا ازال محكوماً بنظام استخباراتي. اخاف ان تحرقني سجائرهم وهي لا تشبه سجائرك الرفيعة بشيء. اريد بوعزيزي ليشعل ثورتي. اريد ان احرق هذا الخجل اللعين الذي يتملكني. ان اقول له "ارحل". ارحل ولا تعد كعلي عبدالله صالح.

-          اراك مع رجل آخر يحتكرك تماماً كما يفعل رامي مخلوف في الاقتصاد السوري. يا ليته يتركك ويتفرغ للاعمال الخيرية.

-          عذراً في آخر الطريق لكن الطريق اليك شاق وتحكمه عقود من العلاقات غير المستوية اللبنانية-السورية. الطريق اليك شاق كطريق الشام. كربيع بيروت وربيع دمشق.

احسان المصري 

بعض من سواد ايلول

- ايلول شهر مليء بالذكريات السوداء بمجملها. 

في مثل هذا اليوم قبل ٤١ سنة توفي الرئيس جمال عبد الناصر :

وفي مثل هذا اليوم من ١١ سنة استشهد الطفل محمد الدرة ليشعل دمه الانتفاضة الفلسطينية الثانية : 

وفي هذا الشهر ايضاً ذكرى مجزرة صبرا وشاتيلا في بيروت عام ١٩٨٢ اثر الاجتياح الاسرائيلي. 

وايضاً ذكرى ايلول الاسود عام ١٩٧٠ في بيروت حين قامت قوات الملك حسين بطرد قواعد الفدائيين من الاردن . 

ذكرى شهداء 29 ايلول

ذكرى شهداء ٢٩ ايلول ١٩٧٦ - صليما . 

تحية لارواح الشهداء الذين سقطوا على يد القوى الفاشية . 

على جناح البيارق

- على جناح البيارق من الحفل الختامي لمخيم الفنانين الشباب - اتحاد الشباب الديموقراطي اللبناني .

غناء : لينا سلامة ولما سلامة - غيتار : ايهاب ابو حمد - علي الصباح - احسان المصري - عبدالله هاشم . 

تحية متأخرة الى جمول والى صبرا وشاتيلا

ان تأتي متأخراً افضل من ان لا تأتي ابداً.

ان تاتي متأخراً ايام على ذكرى تعيشها يومياً هو امر بسيط . اصلاً كل الكلام في يوم الذكرى او بعدها او قبلها  لن يف حق من قاوم وناضل واستشهد منذ ١٦ ايلول ١٩٨٢ الى ٢٥ ايار ٢٠٠٠ وتموز ٢٠٠٦ ومن سيستشهد بعدهما.

ان تاتي متأخرأ ايام بعد ضغوط الحياة اليومية في عصر السرعة هو امر بسيط . ولكن ان يتأخر مقاوم لثوان عن طلقة نار لم يكن ليكون بالامر البسيط.

ان تأتي متأخراً ايام على ذكرى شهداء يملئون باستشهادهم ايام السنة هو امر بسيط خاصة ان كنت تستذكرهم كل في تاريخ استشهاده : جمال ساطي ولولا الياس عبود ووفاء نور الدين ويسار مروة وميشال صليبا وانعام حمزة وحسام حجازي وجورج قساطلي وغيرهم المئات من شهداء الجبهة.

ان تاتي متاخراً ايام من على مقعدك الوثير امر بسيط لكن ان تتأخر ايام الحرية للاسرى الذي كانوا يعدون الدقائق في سجون الخيام وانصار وعتليت ليس بالامر البسيط . من سهى بشارة وانور ياسين وسمير القنطار و سليمان رمضان وكفاح عفيفي وغيرهم المئات والآلاف .

عذراً جمول على التأخير. فانت ذكرى نعيشها يومياً باتجاه لبنان العربي العلماني الديموقراطي الحر. 

ان تاتي متاخراً ايام على ذكرى شهداء صبرا وشاتيلا الذين ذبحوا على يد الفاشية الصهيونية وربيبتها الفاشية اللبنانية امر بسيط اذا كانت صور الشهداء تنير دربك لمقاومة الفاشية والصهيونية يومياً. 

عذراً صبرا وشاتيلا على التأخير فانت ذكرى نعيشها يومياً باتجاه فلسطين الحرة العربية.