الخميس، 30 مايو، 2013

هباء

-         هباء،
نكتب شعراً ونثراً،
ولا أحد يقرأ،
وان قرأوا لا يفهمون،
وان فهموا يصمتون.
-         هباء،
نعزف موسيقانا النخبوية،
لاناس لا يسمعون،
لاناس مشغولين بسماع موسيقى تافهة.
-         هباء،
نسير في الشوارع،
نصرخ بملء اشداقنا،
ولا احد يعرف،
سوى رجال امن يتضاحكون علينا.

-         هباء،
نتناقش وننظر ونحلل،
وكل جدالاتنا البيزنطية،
لن تخلخل شيئاً،
في هذا العالم المتهالك.
-         هباء نحلم،
وبلحظة واحدة تردى الأحلام،
برصاصة في القلب،
ولا أحد يكترث،
لدمائنا المنثورة هباء.
-         فلننسحب بصمت،
قبل ان يتكاثر ذباب المتكالبين،
حول جثثنا النازفة.
فلننسحب،
ننظف دمائنا عن الحائط،
نضمد جراحنا،
ونمضي.
عبثاً، وهماً، سراباً، غباراً،
بل هباء،
تيك هي حياتنا،
فلنمضي مع الهباء المتطاير في الريح.

هباء.

الجمعة، 24 مايو، 2013

امثال شعبية 2

عنجد انو الامثال ما بتكذب . امثالنا الشعبية يا خيي نتيجة خبرات تاريخية. هلق احيان ما بتفهم هالامثال لتلاقي تطبيقاتها عالواقع.
يعني خود مثلاً  "ابنك ما تعلمو الدهر بيعلمو"، بيجو اهلك دايماً بدون يوعظوك انو يا ابني ما تعمل هيك او ما تعمل هيك وانت مراهق ومتيس وشايف الدنيا ثورة، ما بتقتنع بكلامون وبدك تنفذ مرامك.
اهلك بيحذروك انو يا ابني عقال. "ما حدا عقل وندم" و يا ما قبلك جربوا (عادل امام). بعدين "ما متت ما شفت مين مات". هيانا نحنا قبالك ونحنا مرقنا فيهون هول كلون.
واهلك آخر شي بيوصلو لقناعة انو يا خيي خلي يجرب هالشي ويتعلم. بتنفذ وبتوقع وبتتعلم.
"اللي بدو يمشي هالمشيات بدو يوقع هالوقعات". بدك تعمل وتسوي وتطلع وتنزل. من دون ما يصيبك شي. لا بدك توقع.
وانت "رايح عالحج و الناس راجعة" . بس متيس بدك تروح.
خلاصة بتكتشف قديش مهم تتعلم من تجارب اللي قبلك. يا خيي ناس كبار بالعمر خايضين تجارب اكتر منك. تعلم من نصايحون. "عنجد اللي ما عندو كبير يشتري كبير". كتير هالنصايح بتنفع وبتجنبك الوقوع باشياء كان فيك تتفاداها.
وانت لا بدك تجرب و مفكر حالك شي وغيرك بيكون جايبك مش من لانك قوي او حلو لانو في نقص بالقوة او بالحلا "من عازتنا للرجال سمينا الديك ابو علي" هاي ما قاصدين فيها شي او حدا محدد. عم احكي عن حالي خيي.
بس انت بدك تتعلم. بتتعلم بس مع الم وحسرة وندم.
بس انو الندم ما بينفع، بتجي لتندم عاشياء عملتها وما كان لازم تعملها بس خلص بيكون "عدا السبت بطيز اليهودي" بتوصل لعمر انو يا خيي هاي شغلة كان يفترض اعملها بعمر ال 18 مش 25 وبتصير تجمع ندم.

انت بدك تتعلم. وبتكون طالب اشياء من ناس عارف انو بحياتون ما رح ينفذوها. "يا طالب الدبس من طيز النمس". هيدا مزبوط كتير كمان طالب مقاومة من النظام السوري مثلاً هيدي حكينا عنها سابقاً.
ملاحظين قديش كتيرة الامثال تبع الطيز. بكرا بيقولو انو عم نستخدم الابتذال الرخيص. عراية زياد الرحباني "السكس بيجيب عالم". بكرا بيطبو الامة العربية والاسلامية على البلوغ. عم يفتشوا عن كلمة طيز. بس مش رح يلاقو هون غير حكي.
خود مثلاً "المنحوس منحوس لو حطو بطيزو فانوس". هيدا يبقى حظك بالحياة. انو تضلك منحوس. قد ما تجرب تعمل اشياء لتقدم بيطلعلك شي يرجعك لورا كم سنة. حظك تعيس وتبقى ملاحظ انو غيرك اقل منك بكتير اشياء بس يعني السلام لاسمو عاطيه. ما "الله بيعطي اللحمة للي ما عندو اضراس". هيدا مزبوط كتير كمان. اكتر ناس اغنياء هني اكتر ناس ما بيعرفو يستغلو المصاري واكتر ناس اذكياء هني اكتر ناس ما بيعرفو يستغلو ذكائون.

بتوصل لاستنتاج بالآخر انو " عقد بساطك مد اجريك". بلاهون هول الفشخات الكبار يللي عارف انو مش لالك. عارف حجمك هالقد. خليك عقد حجمك. القناعة كنز ما بيفنى. 

الثلاثاء، 21 مايو، 2013

غنية عاطفية 12: الحزب الشيوعي وحزب الله

- علاقتي بك كعلاقة الحزب الشيوعي بحزب الله. 
الحزب الشيوعي شيخ عجوز يفوق الثمانين وحزب الله صبية في الشعرينات. الشيخ الممتلئ وحهه بالتجاعيد اعجب بالصبية ذات العيون الزرقاء والوجه الابيض المرتدية شادوراً. ولكنه يحاول ان يكلمها، ان يصادقها وهي تمتنع خجلاً.
يموت الشيخ ليلتقي بالصبية ولكنها ترفضه. وبرغم كل محاولاته لا تكترث. "مش لاكشتو". ولكنه رغم ذلك لا يتوقف عن حبها. 
يتوق الى لقائها كما تتوق قيادة الحزب الشيوعي الى لقاء حسن نصرالله واخذ صورة بجانبه. ولكنها ترفض فيما تلتقي بكثيرين اسوأ منه. سحقاً ااميل رحمة ووئام وهاب وعبد الرحيم مراد اكثر وطنية من الشيوعيين ام ماذا. لكنه يحبها رغم كل ذلك. 
تقتل له كوادره من مهدي عامل وحسين مروة الى سهيل طويلة وخليل نعوس، لكنه يحبها. 
تقصي مقاومة جمول وتقتل مقاوميها برصاص خلفي ولكنه يحبها.
تمتنع عن التحالف معه في الانتخابات وتصف انور ياسين بانه ضد المقاومة ولكنه يحبها. 
تدنس اضرحة شهدائه في قرى الجنوب ولكنه يحبها.
تدمر قناة اليسارية وتجبرها على الاقفال ولكنه يحبها. 
تفرض انماطها الثقافية وتمنعه من شرب الكحول ولكنه يحبها. 
ما العمل بعد كل ذلك. اليس الاجدى بالحزب ان يتوقف عن محاولته التقرب من حزب الله. 

- حين اسألك ان كنت تحبينني تجيبينني على طريقة وزير اعلام النظام السوري، حين يسألونه ان كان سيرد على الغارات الاسرائيلية فيقول انه سيضرب الارهاب في الداخل لانه متحالف مع الصهاينة. مهلاً معالي الوزير السؤال كان كيف سترد على الغارة الاسرائيلية.

- لست ادري ما الذي يجذب النساء الى الاغبياء. تحب الفتاة الشاب السهل الذي يمكن اقتياده ويفضل ان يكون هذا الشاب غبياً. لطالما حيرني هذا السؤال. ارى شباباً "اغبياء" ولكنهم يتمتعون بصحبة اجمل النساء وكل واحد منهم "الله بيوفقو بشي اربعة خمسة بنفس الوقت". سبحانه تعالى. 
لا تحب الفتاة الشاب المعقد. لا تحب شاباً قد يفوقها ذكاء. هكذا ينجذب الجمهور ايضاً الى الحركات الاسلامية والدينية. هي سهلة الفهم بعيداً عن تعقديات الايديولوجيات الماركسية واستعصائها. 
احياناً افكر ان اتخلى عن اهتمامي بالسياسة والثقافة والموسيقى والادب والشعر والفن و كل ما له علاقة بالذكاء وان اصطنع دور الغبي لربما اجذب احداهن. ساتخلى عن تاريخي كله كالياس عطاالله عل 14 آذار تقبلني في صفوفها.  

الاثنين، 20 مايو، 2013

الى مهدي عامل

في ذكرى الرحيل المفكر الشيوعي اللبناني مهدي عامل، 
استعادة لمقطع من اغنية الفنان السوداني الراحل مصطفى سيد احمد والمهداة الى القائد النقابي السوداني قاسم امين الذي اغتالته عصابات الاسلاميين.
اهداء الى الشهداء الشيوعيين الذين سقطوا على ايدي الاسلاميين والقومجيين،
من شهدي عطية و فرج فودة في مصر، 
الى محجوب والشفيع احمد الشيخ وجوزف قرنق و قاسم امين في السودان، 
الى محجوب عمر في اليمن، 
الى فهد ورفاقه في العراق، 
الى شكري بلعيد في تونس، 
الى مهدي عامل وحسين مروة وسهيل طويلة ورفاقهم في لبنان، 
الى كل الشهداء الشيوعيين.


عذراً على رداءة صوتي شخصياً وعلى الاخطاء الموسيقية ولكن المهم ان تصل الرسالة وليس من يحمل الرسالة




كتلوك الناس القصر
الناس المأفونين
الناس البالة مغطى
والساسة المبيوعين
كتلوك خدم الراسمال
يا زول يا عاتى يا زين
الفرحو الامريكان
والربحو تجار الدين
كتلوك وكان قاصدين
فى ذاتك ناس تانين
الناس ام عرقا يجهر 
السرها يوم حيبين 
يا عادى كما العمال
والريح الحينا بحين
يا صاحى كما الآمال
فى عيون المحرومين
ماشين فى السكة نمد
من سيرتك للجايين
شايفنك ماشى تسد
وردية يا قاسم امين
وردية يا قاسم امين
وردية يا قاسم امين


الجمعة، 17 مايو، 2013

حوار مع رفيق شيوعي حول سوريا

رفيق: شو يا رفيقي عجبك هالتصرف من هيدا تبع النصرة. قال اكل قلب انسان.
احسان: لا اكيد ما عاجبني. انو ليش بدو يعجبني؟ انا زلمي ملحد يا خيي. انو بعدين بتكره الاسلاميين قدي. 
رفيق: لا. لانو بحسك مع المعارضة.
احسان:  لا مش مع المعارضة تبع الجيش الحر والنصرة. بس انو اكيد مش مع نظام بشار. في معارضة وطنية ديموقراطية بس ما بيطلع صوتها بظل قرقعة السلاح. بعدين هات تخبرك خبرية انو هلق شفتلي هالحادثة وهالتصرفات الهمجية تبع جبهة النصرة وما شايف المجازر يللي مرتكبا بشار الاسد. ما صار قاتل 60 الف انسان.
رفيق: يا خيي كيف ما كان احلى من هوديك. انو علماني . 
احسان:  لحظة يا رفيق. وين شايف العلمانية تبعو. ما هوي نظام طائفي اباً عن جد. نظام وراثي. قرا تاريخ وصول حافظ الاسد للسلطة. كيف حيد الضباط السنة وبعدين شحل الدروز والاسماعيليين متل محمد عمران وسليم حاطوم. وآخر شي بلش بالعلويين وحطو لصلاح جديد بالحبس. وهيدي الوراثة من بعدو لابنو بشار. علماني؟ انت عارف ليش حيد صلاح جديد مثلاً، لانو كان من دعاة الحرب الشعبية لتحرير فلسطين وكان من التيار اليساري بحزب البعث. هيدا بدون ما نحكي كيف اقصى القيادة القومية و راح ميشال عفلق لعند صدام. ما ضلون البعث العراقي والسوري مختلفين. عالارجح عاسس طائفية. لانو صدام سني وحافظ علوي.
رفيق: ايه بس كمان ما فيك تنسى انو هوي الوحيد يللي بعدو ما سلم وبينادي بتحرير فلسطين.
احسان: ايه كتير. هيدا نظام يا رفيقي اكتر شي متاجر بقضية فلسطين. هيدا نظام مغطي مجازر بحق الفلسطينيين من تل الزعتر لحرب المخيمات وصولاً الى اليرموك اخيراً. ولما كان عم يدافع عن الفلسطينيين متل بايلول 1970 بالاردن كان عم ينقر عالاردن والملك حسين. وبلبنان بس فاتو الفلسطينيين فات ضدون وضد الحركة الوطنية ليحافظ على المسيحيين بلبنان لانو كمال جنبلاط كان بدو يفوت على بكفيا وكان صار في نظام ثوري بلبنان ما كانت مصلحتو ومنشان هيك اغتال كمال جنبلاط. كمان حافظ الاسد كان يكره ياسر عرفات لانو كان بدو يسيطر على قرار منظمة التحرير لانو بيعتبر انو كل بلاد الشام لازم تكون تحت سيطرتو.
رفيق: طيب عال يا اخي. انا معو لانو هوي الوحيد يللي دعم المقاومة بلبنان وفلسطين والعراق.
احسان: عال هات تنبلش بالعراق. خيي اول شي بالعراق يللي دعمون هني السنة تبع تنظيم القاعدة يللي هلق عم ينق انو عم يحاربو. ما كان مربي قاعديين. سامع بابو القعقاع حتى ما نحكي عن شاكر العبسي وفتح الاسلام. كان هوي عم يدعم القاعدة وايران تدعم الميليشيات الشيعية والاميركان قاعدين بالعراق مع حكومة مدعومة ايرانياً. 
وبفلسطين كان عم يدعم حماس بس لما حماس خضعت لرأي الاخوان المسلمين العالمي وفلت من سوريا صارت خاينة وقتل احد قيادات حماس بدمشق.
وبلبنان الحكي بيوجع.
رفيق: ليش ما دعم المقاومة الاسلامية؟
احسان: مبلا دعم المقاومة الاسلامية. بس بعد ما قضى على جبهة المقاومة الوطنية اللبنانية. بعد ما قضى على الشيوعيين. ليش؟ حتى يحتكر قرار المقاومة بايدو و لانو الشيوعيين عندون عناد. ما كان يطيق ربو لجورج حاوي ومحسن ابراهيم. 
رفيق: كيف هالحكي ما جورج كان حليفون.
احسان: حلف الضرورة. بس كان يكرهو لحاوي متل ما بيكره كمال جنبلاط.هيدا حتى ما نحكي انو الو يدية لبشار باغتيالو لابو انيس. وبيجيك زياد الرحباني بيقلك وليد جنبلاط كان محتكر تمثيل الشيوعيين عند سوريا. لانو السوريين ما كانو يطيقو ابو انيس.
رفيق: هلق شو بدك تبلش تنمر على زياد.
احسان: يا خيي مش تنمير بس انو زياد رائع بالموسيقى. بس يا خيي بالسياسة آراؤه ما كتير. يعني منو مقدس. ما كان اكتر واحد منمر على حزب الله بالتسعينات وهلق كتير بيحبون وكان منمر كتير عالسوريين وهلق متغاضي عنون. سامع حلقة العقل زينة عن مهدي عامل؟
رفيق: ايه 
احسان: ايه طيب ما هيدي كلها تلطيش عالظلاميين مين كانو الظلاميين . حزب الله. وقتها قتلو مهدي عامل وحسين مروة وميشال واكد وخليل نعوس وسهيل طويلة ولبيب عبد الصمد ونور طوقان وغيرون. وهول كلون قتلوهون بغطاء من السوريين.هلق زياد ما شايف غير انو الشيوعيين غلطو. قال كانو عحاجز الرميلة يكبو بيرة عالمؤمنين. انو هيدي شافها وما شاف سلسلة الاغتيالات.
رفيق: هيدي خيي بدنا ننساها منشان المصلحة الوطنية لانو حزب الله مقاوم لاسرائيل.
احسان: خيي حزب الله بس يقاوم اسرائيل عراسي وعيني. بس يقاتل بسوريا دفاعاً عن الشيعة ضد السنة مش عراسي ابداً. بعدين ليش بدنا ننساها ما بعدها هالممارسات مستمرة. من كل انتخابات وقت يللي بيطلع انور ياسين ضد المقاومة لتدمير اضرحة الشهداء بالجنوب لتدمير مقر اليسارية. شو فوتنا مع قدري جميل باليسارية هيدا حديث تاني. هيدا عدا عن تصرفاتو بالداخل يعني من السكوت على اطلاق العملاء لدعم القانون الارثوذكسي للفساد من الادوية تبع خيو لفنيش لسرقة السيارات تبع خيو للموسوي لبيع السلاح تبع خيو لقاووق ولمين للمعارضة السورية. 

رفيق: خيي عال. بس ما زال هالنظام وحزب الله طلعو معك مش مقاومة ليش ضربتون اسرائيل بالله؟ 
احسان: اسرائيل عندها اعتباراتها منع تهريب السلاح لحزب الله او الكيماوي . شو بيعرفني. 
رفيق: ايه انو انت بتوقف مع اسرائيل؟
احسان: لا يا خيي اكيد لا. انو لو رد النظام كان عال بس يا ريت. ما صرلو 40 سنة بالجولان ما مقوص رصاصة.  بيقوص باللبنانية والفلسطينية متل ذكرى النكبة من سنتين بعت الفلسطينيين ليموتو فاجو على اليرموك وحرقو مقر القيادة العامة كردة فعل. تاجر هيدا النظام. 
رفيق: خيي عال بس عالقليلة ما وقع معاهدات سلام مع اسرائيل.
احسان: يا رفيق ما وقع لانو ما كانت تزبط معو يوقع. ما بالسبعينات اجا السادات على سوريا قبل ما يوقع الاتفاقية وحجزو حافظ الاسد ما كان بدو يخلي يرجع عمصر لانو كان بدو يوقع لوحدو. فقاطعو مصر وقتها: جبهة الرفض اذا سامع فيها. وصولا الى مفاوضات مدريد وصولا الى آخر شي الى المفاوضات عبر الاتراك. هلق الاتراك صارو عكاريت. 
رفيق: ايه الاتراك عكاريت والقطرية والسعودية والاميركان والاسرائيلية وكلون داخلين بالمؤامرة. 
احسان:  ايه مزبوط هول كلون عكاريت وبعدون. مش ساعة منعلق صورة لاردوغان بعد مجزرة سفينة مرمرة وساعة منشيلها وساعة شكراً قطر وساعة قطرائيل. كانوا عكاريت وبعدون. وكلون داخلين بالمؤامرة بس لما يكون حدا عم يعمل عليك مؤامرة ما بتفتحلو طريق. لما بلشت الثورة بدرعا مع كم ولد تقطعو اصابيعون .لا كان في مؤامرة ولا سلاح. هيدا النظام جاب الدب عكرمو.
رفيق: والله خيي شو ما كان. اذا الخيار بين هيدا النظام والمعارضة. انا مع النظام.
احسان: خيي انت حر تكون مع مين ما بدك. بس انا لا مع النظام ولا مع المعارضة.
رفيق: ما فيك يا اخي بدك تكون مع حدا
احسان: لا فيك ما تكون مع ولا حدا من هول. هيدي ثنائية بوش- بن لادن طلعو منها. انو يا بدنا نكون مع بوش يا مع بن لادن. يا مع 8 يا مع 14. يا مع البعث يا مع النصرة. فيك تكون ضدون تنينون. تكون انت كيسار الخيار التالت.
رفيق: يعني الله يساعد اليسار او ماركس يساعد اليسار.
احسان: ايه اكيد. بس لازم اليسار يساعد حالو.
رفيق: وين بدو يساعد حالو يا رفيق. 
احسان: خيي هيك حوار منيح لو شو ما كان. على الاقل بعد ما تطور لتضارب بالايدي او الكراسي. 

الاثنين، 13 مايو، 2013

احزم حقائبك وارحل


-         احزم حقائبك وارحل،
لم يعد هناك شيء لتنقذه.
بلاد تحترق،
احفاد علي ومعاوية،
ويزيد والحسين،
يقتتلون انتقاماً لاجدادهم.
وموسى يتدخل عند اللزوم،
وآلهتهم تشاهدهم من عل.
-         احزم حقائبك وارحل،
لم يتبق لك شيء.
بع ارضك من دون ان تكترث لديموغرافيا الطوائف،
اترك اهلك في بيتهم الريفي،
احضر معك حسابك البنكي،
فبلاد الارض واسعة،
وكما تقول اغنية "ميتاليكا":
حيث تلقي رأسك يكون الوطن.
-         احزم حقائبك وارحل،
بلاد الارض واسعة،
وكما يقول وليد جنبلاط:
" افضل ان تكون زبالاً في نيويورك من ان تكون زعيماً وطنياً في لبنان"
فكيف اذا كنت مواطناً عادياً.
اذهب الى نيويورك ،
ولا تكترث لصراخ جدتك :
"يلعن النايورك وساعتها".
اذهب الى نيويورك ،
واعزف على قيثارتك على قارعة الطريق.

-         احزم حقائبك وارحل،
ربما الى فرانكفورت،
قد تدرس علم النفس،
تعلم من ماركوزه،
كيف تقبع رغباتك الجنسية،
في عصر الحضارة الرأسمالية،
وفي هذا الوقت،
قم بزيارة امستردام،
وضاجع ما شئت من النساء،
مثنى وثلاث ورباع،
ثم عد الى فرانكفورت،
واكمل دراسة علم النفس،
تعلم من فرويد،
كيف تقتل الاحلام في اللاوعي،
كي تنزع طعنات الفتيات الجميلات،
المغروزة في جسدك النحيل.
-         قد تعود يوماً ما،
حين يمكنك ان تنام في فراشك من دون ان يزعجك احد،
حين يمكنك ان تقود سيارتك في شوارع بيروت بهدوء،
قد تعود ربما،
حين تختفي تلك الرائحة المقرفة في الكرنتينا،
وربما قد تعود لتدفن في تلك القرية النائية،
ولكن الآن،
احزم حقائبك وارحل.

الجمعة، 10 مايو، 2013

كنا خمسة بالتاكسي 11 : لاجئ سوري

كنا خمسة بالتاكسي.
لا فعلياً كنت وحدي. اخدت التاكسي من اول الحمرا. فجأة في شب واقف عجنب الطريق وطبعاً التاكسي حيوقف ليسألو. لانو بطبيعة الحال هوي رح يسأل ايا واحد ماشي عالطريق او عالرصيف او بايا مطرح بالعالم: "وين واصل" (شي بيشبه المشهد بمسرحية زياد الرحباني بخصوص الكرامة والشعب العنيد).
خلاصة هالشب معو شنطة سفر. كان عم يسال عن اوتيل البريستول باول فردان ويللي بيبعد عن مطرح ما هو موجود بالحمرا دقيقتين سيراً على الاقدام. هلق انا بدي قلو انو طلاع مشي كان التاكسي استلفو وطلب منو 5000 فالشب وافق بلهجتو الشامية. ما عاد الي عين احكي لا الشب ولا شوفير التاكسي.
هلق اكيد انو هالشب من البورجوازية السورية لانو ببساطة قادر يطلع بسرفيس. بس بغض النظر هالحالة بتثبت قدرة الفينيقي على النصب (عينك بنت عينك) وخاصة على الناس الاجانب يللي معون مصاري. اما الناس يللي ما معون مصاري سواء سوريين او غيرو فتعتير وشحار. مضطرين يتحملو ابشع انواع العنصرية اللبنانية.
صرلنا شي سنتين عم نسمع النق حول اللاجئين السوريين. بتطلع بالباص حد اي مواطنة لبنانية وسماع الحكي : "ليك شو كترانين هول" و"ليك هاللهجة الغريبة اللي بيحكوها" (اللهجة البدوية).

طبعاً اللاجئين السوريين بلبنان نوعين. النوع الاول الفقير والمعتر يللي عامة جايي من الارياف متل درعا ودير الزور وغيرون ويللي بيحكي اللهجة البدوية الصعبة على اللبنانيين وفي اللاجئين من البورجوازيات السورية بحلب ودمشق وغيرها ويللي عامة جايين ومعون سياراتون يللي كمان عم نسمع نق حواليها انو ليك النمر الدمشقية والحلبية كيف متلاية بيروت. مع انو فعلياً هودي الناس ممشيين البلد اقتصادياً.
بس طبيعة اللبناني العنصرية يللي بتكره السوري كيف ما كان. ما بتحسب حساب انو هربان من بطش نظام دموي و جبهة نصرة رجعية مقابيلها. هالطبيعة العنصرية كمان الها ابعاد طبقية.
يعني تصرف اللبناني مع الخليجي (رغم كرهو للخليجي) غير تصرفو مع العاملات الاجنبيات يللي بيشملون تصنيف واحد بعرف العنصرية اللبنانية (سيرلنكيات : ما بيأثر من ايا بلد بيجو). تصرف اللبناني مع الخليجي انو مستعد يمسحلو ليقبض مصرياتو ويحاول ينصبو اما مع العمال والعاملات الاجانب فمسخرة وعنصرية وقلة ادب بتوصل لحد الجرايم.
نفس هالتصرف العنصري الو ابعادو الطبقية مع اللاجئين السوريين. مع الاغنياء بيمسحولون لياخدو المصاري ومع الفقراء بيمسحوا فيهون الارض. وبالحالتين بيسبو سوريا.
وهيدا التصرف بيتخطى الخلاف بين 8 و14 آذار سياسياً. جماعة 14 اساساً كانو عنصريين ضد السوريين لكرهون النظام وجماعة 8 صاروا عنصريين لخوفن من الثورة (تصريحات الباسيل وتصرفات اهالي المخطوفين باعزاز امثلة).
خلاصة اللاجئ السوري بلبنان صرلو سنتين عم يعاني. بالتاكسي وبرات التاكسي. هوي اللبناني عم يعاني فالله (اذا بيقدر) يساعد الغرباء.
وساحب فينا هالتاكسي. 

الخميس، 2 مايو، 2013

هربت سمر يا رشيد


-          يا رفيق رشيد بس قبل ما نفوت بالحديث مقدمة بسيطة.
خيي انا عندي مرض مزمن :وجع بالمعدة، هيدا سببو بشكل رئيسي التعصيب يضاف عليه الاكل الهندي والكباب الحر والتدخين. وعادة بيصير في اضطرابات بالمعدة نتيجة التعصيب. لاقيت مع الوقت انو في حلين للموضوع: الحل الاول هوي الموسيقى وهيدا حل عابر، بتعزفلك ساعتين بتروق. بس الحل الاكثر جذرية كان الكتابة. الكتابة بتطلع فيها كل شي. بتصفي حسابات. بتطلع اشياء مش قادر تقولها. بعدين بترتاح المعدة.
انا عامة شاطر بالكتابة اكتر من الحكي. يمكن رهبة المواقف. الكتابة بتكتب عالرايق ما بتكون تحت ضغط وجود العامل البشري. ولما لا يتاح لالي التعبير كلاماً ساعتها بفضل الكتابة.
-          والله صحيح الحب مش قضية جدية كتير. انا كنت ما مصدقها متل ما كنت مصدق افلام الخيال العلمي تبع هوليوود.
ليك يا رشيد، انا زلمي كتير عقلاني بحسب لكل خطوة قبل ما اعملها مليون حساب وعادة بخلي عقلي يتحكم بكل خياراتي. منشان هيك في كتير تفاصيل راحت عليي بحياتي لاني بحكم عقلي قبل غريزتي. ويمكن منشان هيك زيادة علاقاتي محدودة ) يعني انك تكون انت وانسانة بفرد غرفة بالليل لوحدكون وما تعمل شي انطلاقاً من اخلاقك العالية مثلاً، هاي جرت عليي اتهامات بالمثلية. شفت الاخلاق بتطلع عاطلة  هالايام، وخاصة مع اي سمر بال Summer بلبنان).
 انا زلمي كتير عقلاني. بس هالمرة كان شي غريب، هالمرة (يمكن لاول مرة) خليت قلبي يقودني. علقت. عقولة الشيخ امام:
حب يعمل واد فكاكه
و يمشي حبه ف الزمالك
و القيامة و الفتاكة
يرموا طبعا ع المهالك
-          بهالوقت هيدا بيتغير كل شي. بتتغير تفاصيل نومك وتفاصيل حياتك. بيصير تفكيرك عم يحور ويدور حول سمر. شي مخيف رشيد. الحب مخيف رشيد. ما بتكون مفكر فيها هاي. انو شي لذيذ يابا. ايه لا منو كتير لذيذ. هيدا حب بعدك لا فكرت بزواج ولا بمسؤوليات متل ما عم تحكي انت. هيدي بدها دراسة عملية التعلق والحب، دراسة علمية من حضرتك. بعدين بدك تركزلي شوي عموضوع اللاوعي عند فرويد وكيفية تشكل الاحلام. هاي الشغلة عم تشغلني مؤخراً.
-          الحب مخيف. بتصير كل غنية، كل كلمة بغنية عم تسمعها، بتصير تعني شي. من "المزهرية" لعبادي الجوهر ل"بلاش معاندة" لسيد مكاوي. ومن "حن وانا حن" لياس خضر ل"يا بنت الناس" لعزيز مرقة (مع الفارق الفني طبعاً) وبتصير تختمها مع "مشكورة" لفؤاد سالم لاغاني اجنبية مثلاً Scars  ل Elegeion  .... الخ عقد ما في بمكتبتي الموسيقية اغاني.
-          وبطبيعة الحال واحد متلي بيكتب شعر. طبيعي يكتب قصايد. مع انو النساء هالايام ما بتتفاعل مع القصائد. في صبية قريتها قصيدة عيناك لنزار قباني وسمعتها ياها بصوت خالد الشيخ قال شو هالماساوية. او ممكن شو هالرومانسية. باي عصر عايش.
-          بعدين بيطلع انو الاخت سمر عندها مشاكل. ماشي الحال بسيطة. لا تلام. يمكن مرتبطة بحدا تاني او عندا مشاكل تانية شو بيعرفني. لا تلام. بس انو انا يابا شو جايي من اسكندينافيا وعم عاني من الرفاهية الزائدة.
-          احدى الصديقات الفايسبوكيات بتحطلي هالمقطع لمحمود درويش لتزيد الطين بلة:
هي لا تحبك انت
يعجبها مجازك
انت شاعرها
وهذا كل ما في الامر

-          ليس. صرت لاحظلك سمر عم تتهرب مني او تهرب مني. يابا كاني شي بعبع. يا خيي قسماً بالزهر والسنابل، ما باكل عالم انا. بس يا اخي خلص سمر بدها تهرب. سمر هربت. شو بقعد بلحقها.
-          خلي هالحكمة يللي كنت مفكرها اجنبية وسامعها بغنية  RAP . لمين بدك ياها تطلع لجبران خليل جبران. خلي هالحكمة تقود مش القلب:

“If you love somebody, let them go, for if they return, they were always yours. If they don't, they never were.”