الثلاثاء، 17 ديسمبر، 2013

طريق القصير... تمر في سكايبار

شو خلصتو مسخرة على يسار الحمرا. خطير يسار الحمرا عاساس. اكتر ليلة بيصرفلو 5000 ليرة على فنجان قهوة او قنينة بيرة بشي pub حاطط اغاني للشيخ امام. وبيضلو سهران شي خمس ساعات بخمس آلاف.

بعدين يسار الحمرا يا رفاق، على الاقل بيضلو بقعداتو يناقش اشياء يسارية. 
مش انو شي حلو ومهم اللي عم يعملو بس انو اساسا شو عندو شي تاني يعملو. انو كاينين مكلفينو بمهمات ضخمة وما عم ينفذها. 


ايه لأ معليش تبقو انتبهو ليسار جديد نأزل عالسوق وعم يخبط بالحيطان قد ما هوي قوي ومش شايف حدا قدامو. يسار مرتاح ماديا. وبيروح يسهر ب skybar و white و mad. يسار بيهز على اجمل واقوى الانغام الرأسمالية وبيرجع بيجي بيقلك انا مقاطع الماكدونالدز. يخرب زوقكون كيف كل واحد بيركب نظرية عزوقو. انا مركب نظريات كمان مش انو شي. يلا هزو. هوي اليسار كلو عم يهز. بعدا واقفة على كم واحد ووحدة عم يهزو.
بس لذيذين يبقى هوي مخلص هز من السكايبار ومميل على المعاملتين تيعمل علاقات اممية. وهيي لتبلفو بتعمل علاقات اممية كمان مع اللي هزت معون. شو بينقص ها. يا عهد الاممية او يا عهر الاممية صارت؟ آخ. 
ووين اللذة فيهون بيوعو تاني نهار من السهرة شي الساعة بعد الظهر وبتدب فيهون النخوة القومية دفاعا عن بلاد العرب اوطاني فبيتذكرو المؤامرة على سوريا ويلا لولا شوي على القصير. جبهة مقاومة وطنية عربية من نص دين الوايت. يقبشني جمالكون. 
ليكو تبقو خففو مش عم نقلكون توقفو. وانتبهولي لهاليسار الفلتان على الطرقات.

ليست هناك تعليقات:

إرسال تعليق