الأربعاء، 21 أغسطس 2013

كلنا بفرد خندق


"كيف بدا تظبط هيدي ...كلنا بفرد خندق يعني ...كلنا بفرد خندق يعنيييييييي ...شو هالخندق هيدا ...الرجعية مع اسرائيل ..يعني اسرائيل معنا بفرد خندق"
يصرخ الرفيق نزار في المسرحية .
وقتها بال 76 تحالفت الحركة الوطنية مع مصر السادات والسعودية ضد النظام السوري البعثي واخدت منهون سلاح وهني حلفاء اسرائيل بالمبدأ. وساقبت انو اليمين تحالف مع سوريا ضد الفلسطيني وكان عم ياخد سلاح من اسرائيل بنفس الوقت.
كمان مرة يكرر التاريخ الماركسي نفسه بشكل مهزلة ومأساة.
بعض الرفاق الماركسيين رح يصيروا متل الرفيق نزار وهيدي اقوالون:
"نحنا مش مع النظام السوري يللي هوي نظام قمعي (وبيتغاضو عن كل مجازرو)، بس نحنا ضد جبهة النصرة والقوى الاسلامية السلفية (لانون بيقطعو روس) منشان هيك رح ندعمو مؤقتاً خاصة انو هوي وايران (يللي هيي سلفية شيعية) داعم المقاومة الاسلامية (السلفية الشيعية ايضاً) بوجه اسرائيل ولانو كمان عم يواجه التحالف السعودي القطري التركي (قطرائيل متل ما بيسميها احد رفاقنا بالنداء)"
 طيب عظيم لهون تمام.

"بس نحنا مع السيسي بمصر (يللي داعمتو السعودية والامارات يللي نحنا ضدون بسوريا) لانو ضد الاخوان المسلمين ( يللي ساقبت انو ايران بتحبون لانو نهضة اسلامية وقطر كمان). صحيح منعرف انو السيسي ما رح يلغي كامب دايفيد مثلاً يعني السيسي ممكن يكون مع اسرائيل متل ما ترجمت جريدة الاخبار عن محللين اسرائيليين انون بيفضلو السيسي) رغم انو الاميركان غضبانين على السيسي."

كلنا بفرد خندق يعني

قلنا من الاول يا رفاق. ما تنحازو لهالمحاور يللي مجربينا كتير قبل. صحيح الحزب الشيوعي بمواقفو الرسمية بيبن محايد. بس موقف الشيوعيين العامة منحاز.
خلينا نبني تجربتنا. تجربة اليسار يللي شايف الغلط بمطرحين احلى ما نجن بالآخر متل الرفيق نزار.


ليست هناك تعليقات:

إرسال تعليق