الخميس، 14 فبراير، 2013

كنا خمسة بالتاكسي 9: زواج شيوعي يا رشيد

ما كنا خمسة بالتاكسي. كنت لوحدي انا والشوفير منطلقين من الحمرا باتجاه الاونيسكو. طلع الشوفير درزي من الجبل. منا مشكلة. المشكلة انو طلع سميك الدم. يعني محاولات تلطيش عكل صبية بالشارع. محاولات هضامة. والانكى من هيك كلو انو طلع مبندق. يجرب يفتح حديث وانا ما الي جلادتو واكتشف بسرعة اني خجول. هلق الرفيقة نارا بدا ياني اعمل كاميكاز واطحش على البنت وكجا هيك عينك بنت عينك. مع انو نارا بتعرفيني شخصياً وبتعرفي اني خجول. ولك يا جماعة شوفير التاكسي بخمس دقايق اكتشف هالموضوع. منا مشكلة هلق منحلا الخجل. هوي البطرك وطلع على سوريا. 
ولا اكتشف اني كمان بالفطرة حزين. قلي عشو زعلان. قلتلو مش زعلان. قلي: اضحك شو فيها عالحياة. شو رح تخسر. 
يمغط باللهجة الجبلية المأصلة ويقلي : شو عامل عبالنتاين (مش الويسكي يعني العيد). مش رايح عمانو (مش تبع السجق قصدو شارع مونو) . قلتلو له يا خيي. قال معقول وين سهران قلتلو بالبيت. قلي ما بصدق واحد عبالنتاين سهران بالبيت. 
المهم انو طلعت معنا صبية مكملة عالجناح و انا نزلت عالاونيسكو بس سلفت هم هالصبية رح تتعرض لجلاطة منظمة اكيد. 
ليك يا رشيد انا عبالنتاين مش عامل شي. لانو اساساً هيدا العيد بابعادو الحالية الرأسمالية صار متل اي بضاعة استهلاكية منشورة بالسوق. بعدين مني مرتبط ليش؟
خيي صراحة توصلت لقناعة انا شخصياً عنجد صعبة عليي كشيوعي انو ارتبط بفتاة غير شيوعية. يعني متل كانو واحد من جبهة النصرة عم يرتبط بفتاة بعثية. ما بتركب. يعني انو بتزبط بس اكيد انو بيقضيها الواحد دب وعرس. 

رشيد انا برأيي سمر امر مفروغ منو. ما بقا تبحث فيه يا اخي. خيي هالفتاة مش مناسبة. اذا بس بدك توصل لتناقش مواضيع جدية بالفلسفة والفكر والسياسة بدها يغب على قلبها. تركها خيي. حتى اذا كتبتلا شعر او موسيقى مش مهتمة. 
 وانا بعرف انو انت وانا وكل شيوعي بيحبو اللت والعجن بالمواضيع الآنفة الذكر. لاقيلك شي سمر تاني شيوعية. 
انا يا خيي جربت فتش وفشلت. جربت احكي مع فتاة متأمركة: لاقيت حالي بالانكليزي متل محمد مرسي. يعني Civilization against civilization . خيي مني مضطر انو يطلعلو شي باسم يوسف يتمسخر عليي. بيطلعلك فتاة ثانية بتشتغل بكاريتاس بتصير بدها تقريك انجيل و تخليك تشتغل اعمال خيرية (مش غلط). فتاة ثالثة ورابعة وغيرهن. 
ما في يا خيي بتضلك متل اللجان يللي بتناقش قانون الانتخابات بين 8 و14. ما بتوصل لنتيجة. 
خيي الفتاة الشيوعية ما عم قلك انو يابا رح تتفق انت وياها على كل شي. بس انو في حد ادنى من التفاهم. فيك تروح انت وياها عتظاهرة بدل ما تروحو عمانو. ممكن تسمع انت وياها صوت الشعب يا اخي مارح تحط بالسيارة ناجي الاسطا ولا ايمن زبيب. فيك تحط صورة شكري بلعيد بالبيت مش بس صور العرس. والعرس في يكون شو ما كان.
خيي بعدين تتزوج انت وياها مدني وما حدا بيقلك وينك. يعني المفتي ما بيتعرضلك. خيي مش زواج مدني زواج شيوعي. ومتل ما بيقولو الرفاق بسهرات النضال مع غنطوس وبو رعد: 

على دلعونا ليش حبيتيني
عرفتيني شيوعي ليش اخدتيني
لاكتب كتابك مذهب لينيني
واجعل اطفالك ماركسيونا 

هناك تعليقان (2):

  1. جميل يا صديقي .. فينا ما يكفي من التناقضات .. فكيف اذا بدنا نرتبط بحدا من برا .. يعني الله وكيلك بنصير متل تللي عم يلعب دورين بهالحياة .. اول دور انت الشيوعي اللي حامل هم الحلم عكتافك .. وتاني دور هيداك المغروم الحالم اللي بدو يفرجي حبيبته اللي مش شيوعية انه هو جدير فيها .. و قادر ما يزعجها بثوريته يللي هي ما بيعنيلا منها غير اللون الاحمر على وردة محطوطة فوق كادو بالمناسباتت . سعيدة كانت او غير سعيدة .. والمشكلة انه ما في لعبة بالعالم بيطلعلك فيها دورين .. تحياتي الك رفيقي :)

    ردحذف
  2. بالزبط رفيقي. هيدي معضلة . انا بدور واحد مش مخلص

    ردحذف