الاثنين، 29 أكتوبر، 2012

شيوعي بالجبل


شيوعي بالجبل. امر ليس غريباً يا رفيق سامي كشيوعي بالشرقية خاصة  في السبعينات والثمانينات.
الجبل كان من ضمن المناطق "الوطنية" واليسارية، وكان هناك نزعة يسارية كبيرة. ورغم الوجود الاكبر للحزب التقدمي الاشتراكي الذي قاد اليسار حينها كونه لا يزال يسارياً وخاصة ايام المعلم الشهيد كمال جنبلاط  فقد كان هناك تواجد بارز لاحزاب اخرى كالقومي والشيوعي والبعثين السوري والعراقي والديموقراطي الشعبي و الناصريين مع بعض المنضوين في الفصائل الفلسطينية.
والحقيقة ان التحالف التاريخي بين الحزبين الاشتراكي والشيوعي قد اتاح تداخلاً كبيراً بين الحزبين. ففي عائلتي الاشتراكية كان شيئاً طبيعياً ان تجد كاسيت قديم كجبل الباروك لمارسيل خليفة والميادين مهدى لكمال جنبلاط او ان تجد مؤلفات ماركسية صادرة عن دار التقدم آنذاك احضرها الوالد من الاتحاد السوفياتي. هكذا ايضاً عندما تسمع اخبار المقاتلين لا تميز بين الشيوعي والاشتراكي خاصة ان الاثنين كانا منضويين في جيش التحرير الشعبي – قوات الشهيد كمال جنبلاط  ويصبح امراً عادياً حين تعرف ان معركة بحمدون في حرب الجبل بدات بعملية استشهد فيها احد الرفاق الشيوعيين من الجبل مع شهداء اشتراكيين. هذا عدا عن ان قريتي كانت معقل رئيسي للشيوعيين في الجبل ومنها خرج شهداء ومقاومون واسرى في الحزب وفي جبهة المقاومة.

كل هذا من الناحية الايجابية جيد. ولكن الحياة ليست بهذه الايجابية. ففي مرحلة ما وكما حصل عندك ذاك الوعي والحشرية، دفعتني حشريتي الى الغوص اكثر في البحث عن الشيوعية فمن اغاني خالد الهبر والشيخ امام الى البيان الشيوعي الى صوت الشعب الى النقاشات السياسية الى الخلية التي اسسناها في الجامعة. اصبح بامكاني ان اقول انا شيوعياً اثناء تشييع الشهيد ابو انيس. حينها تخطيت هذا الحاجز الفاصل بين الشيوعية والاشتراكية.
وحين تخطيت ذلك الحاجز في الزمن الصعب، كان الخلاف عميقاً بين الشيوعيين والاشتراكيين وكان عليك ان تدافع عن وجهة نظرك وتصبح كشيوعي في الشرقية او في منطقة لبنانية اخرى تحت الضغوط الطائفية والاجتماعية. اكثر من ذلك كان عليك ان تفسر لجدتك "انو الشيوعيين ما بينامو مع اخواتون" و ان هناك تيارات سياسية خارج الصراع اليزبكي-الجنبلاطي الممتد من 600 سنة وان تدافع امام آخرين عن وجهة نظر الشيوعيين الى الدين. وكان عليك ان تفسر سبب انهيار الاتحاد السوفياتي وتنتقد ارتكابات ستالين في سيبيريا. وتبرر لآخرين سبب زيارة امين عام الحزب الى سوريا في وقت كان وليد جنبلاط يقضي معظم اوقاته في سوريا وان تشرح كيف خاض انور ياسين المعركة في الجنوب بوجه التحالف الرباعي وكان عليك ان تدافع في حرب تموز عن حزب الله و"الشيعة" في وقت كان البعض يؤيد اسرائيل علانية وكان عليك ان تفسر اقتناعك بفكرة المقاومة مع تحليل نقدك لمقاومة مذهبية ارتكبت خطيئة في 7 ايار بانجرارها الى الداخل. وكان عليك ان تشرح دعمك للثورات العربية كاملة بغض النظر عن التدخلات الخارجية والرجعية وتحديداً في سوريا.  وكان عليك ان تشرح عدم تقيدك  بقرار قيادة في حزب فيه من الديموقراطية اكثر مما في احزاب اخرى تنقاد لراي الزعيم.
وكان عليك ولا يزال عليك الكثير ولكن بسيطة. "لانو يللي بدو يمشي هالمشيات بدو يوقع هالوقعات".
وحين تلتزم 88 سنة فيها فرج الله الحلو وجورج حاوي، وفيها مهدي عامل وحسين مروة، وفيها جمال ساطي ولولا عبود، وفيها انور ياسين وسهى بشارة، وفيها زياد الرحباني ومارسيل خليفة، وفيها وردة بطرس وفرج الله حنين، وفيها الكثير الكثير مما لا نستطيع ان نذكره. حين تلتزم لا يمكنك التراجع ولا يمكنك الا العمل للتقدم.

الخميس، 25 أكتوبر، 2012

88 سنة: ما عملنا شي

نفس الكلام عم نحكي على حيطان جمول او الفايسبوك من فترة. حكي من دون عمل. دق على الكيبورد على جمول بيحسسك عم نعمل شي ومجلة واحتفال هون او هونيك. بالنسبة لغيرنا عم نعمل شي لانو غيرنا ما عم يعمل شي. بس فعلياً نحنا ما عم نعمل شي مهم. في بلد عم ينزلق على حرب اهلية ونحنا عم نتفرج على جيوش معاوية وعلي عم تتحضر لموقعة جديدة. سمعت انو الحزب رفع شعار " يا بيي انا خايف تمحينا الطوايف" . ما شفت حتى لوغو لافدي ايماني.


نحنا عم نعمل اكتر من غيرنا. معقول ذكرى 88 سنة لحزب بهالعراقة بتقطع ببيان بس. منا منيحة بحق هال 88 سنة. باسل معو حق يغضب بس طريقتو بالتعبير عصبية. المشكل مش بسيجار خالد حدادة بس ولا بخالد حدادة شخصياً. المشكل كبير عند القيادة بشكل عام. عند حرس قديم بعدو معلق بكليشيهات ولى عليها الزمن ( كلشيهات متل الامبريالية مثلاً. يا خيي انا شيوعي وضد الامبريالية ومني ليبرالي ابداً ولا يسار ديموقراطي بس صايرة كلمة الامبريالية وتحديداً بس اسمعها من بعض الناس بتثير اشمئزازي. ولو خامنئي بيحكي بالامبريالية. قليلة هاي. عقولة الرفيق جميل "ولك الامبريالية حقيرة" بس انو انو انتو من عشرين سنة ما عملتو شي).
وبما انو ما عم نعمل شي من فترة. عم نحتفل كل سنة اشياء عاملينا من زمان كتير من ال 1924 وال 1982. وكل سنة عم نعيدها. ما في جردة حساب لما ما يكون عم ينعمل شي.
منشان هيك في كتير ناس قاعدة بالبيت من القرف وناس قعدوها هني بالبيت وفصلوها وناس بتحب تفوت بس ما لاقية شي يجذبها. ومنشان هيك كمان رفاقنا بالمنتدى حتى بطلو يشاركو.
اللي عم نقولو انو بدنا نضل هون منظمين او غير منظمين وما رح يخلونا نترك لانو الحزب لالنا. وما رح نترك ونروح على غير مطرح اكيد. هلق هيدا كلو حكي. بس شو بدنا نعمل؟ لازم نعمل شي. شي على مستوى. فكر فيها . انت وفيصل سلمان على المستقبل وردوا عليي.
وانا بهالوقت المستقطع بحب اهديك هالغنية لتانيا صالح الك وللرفاق:
" لا قلي ولا قلتلو ما قلنا شي
راحت ساعة عالفاضي و ما عملنا شي
ما شفنا شي - ما فهمنا شي.
"والسيارة كركوعة موديل الستين
النمرة عنا مقبوعة وضو اليمين
بعلمك انو قلعنا بعلمك ماشيين
فجاة طفيت بارضها وضوى البنزين"
ملاحظة: الجمعة كانت بالصيف مش بالصيفي. لو بالصيفي كان الشيخ سامي الجميل معنا. بس نحنا كان معنا الشيخ سامي خوري.



الاثنين، 22 أكتوبر، 2012

وسام الحسن: حلقة في سلسلة

اغتيال وسام الحسن هوي جزء من مسلسل اغتيالات . بلش مع محاولة اغتيال مروان حمادة لرفيق الحريري وصولاً الى الحسن.
فينا بكل لحظة نشك باي حدا. طبعاً الاتهام الموجه للموساد دائماً موجود وغير مستبعد او للاستخبارات الاميركية او الغربية نظراً وبناء على رأي الرفيق ابو نضال انو ممكن يعملوا وهيدا شي اكيد ما فينا ننفيه.
وطبعاً الاتهام المضاد الموجه للاستخبارات السورية او الايرانية او احزاب لبنانية دائماً موجود بناء على خلاف سياسي عميق وبناء على اتباعون هالوسائل ايضاً تاريخياً.
انا شخصياً اميل للفرضية الثانية مع عدم استبعادي الفرضية الاولى.
ليش؟
رح ركز عمجموعة اسماء.
كل المنضوين في 14 آذار هني معادين او كانوا يحاولون معاداة النظام السوري والنظام السوري خلال وجودو بلبنان او خروجو منو كان من مصلحتو القضاء عليهون بمفردو او بمساعدة لا استبعدها. طبعاً ممكن اسرائيل تعملها لتصق التهمة بالنظام. بس النظام جسمو لبيس.
ومن اغتيال كمال جنبلاط وضرب مشروع الحركة الوطنية والمقاومة الفلسطينية الى تل الزعتر الى حرب المخيمات الى تغطية اغتيال قادة شيوعيين بالمناطق الوطنية. هيدا النظام كان يعادي اليسار الجذري. ( وطبعاً فينا نتوسع بما فعله النظام في الداخل السوري وتحديداً ازاحة صلاح جديد وضرب حزب العمل الشيوعي وتحجيم البكداشيين حلفائه).
رح ركز على هالاسماء:

سمير قصير: اكتر ما يؤكد ضلوع النظام بمقتلو هوي انو سمير كان معادي تاريخياً للاسد قبل ما يكون الحريري وجنبلاط معادين. وكان من اوائل الكاتبين ضدو وجميل السيد عمل معو اكثر من ضرب. كمان سمير بغض النظر عن موقفنا منو ومن الياس عطا الله كان باليسار الديموقراطي وكان وجودو بيجرب يعطي طابع علماني ل 14 آذار. وقتل سمير كمان لانو رفض التحالف الرباعي يللي شوه 14 آذار يللي كان بيعتبرها حركة ثورية ( كمان بغض النظر عن الاتفاق على هالتسمية) و فاتت بزواريب السياسة.

جورج حاوي: بقضية جورج حاوي  ممكن اكتر شي نشك انو الموساد يكون الو يد نظراً لتاريخ جورج المقاوم. بس الموساد ما قتل جورج من ال 82 وقت الي اسس المقاومة وكمل فيها. بس ليش الشك بسوريا موجود : بال 2005 جورج كان بتيار وسطي مع ميول ل 14 آذار هوي ومجموعة من القادة الشيوعيين ( جورج بطل وكريم مروة والرفاعي وغيرون) وكان عم يجرب يعمل مصالحة بين اليسار الديموقراطي و الحزب الشيوعي (تحديداً بانتخابات الشمال: الياس عطا الله وعطا جبور ). ومجرد وجود جورج كقائد مقاوم و علماني ب 14 آذار كان بيزعج السوريين يللي بيجربو ينقلو الوضع لصراعات طائفية. اكتر من هيك جورج تاريخياً على عداء مع نظام الاسد من ايام كمال جنبلاط وصولاً لتصفية قيادات شيوعية وصولاً للمعارك مع حركة امل ( المدفوعة بعثياً) وصولاً لتحييد جورج سياسياً وانتخابياً خلال التسعينات (سواء عبر جنبلاط متل ما صرح الرفيق زياد او عبر غيرو). بالتالي متل ما الاسرائيلي الو ثار مع جورج كمان السوري الو ثار.
وهون بستنكر كتير الانتقادات يللي توجه من جزء من الشيوعيين لجورج نتيجة خيارو. يللي هوي خيار انسان رؤيوي وعقلاني متلو متل محسن ابراهيم. (راجعوا بيان منظمة العمل الشيوعي المختفية عن الساحة سنة 2005 وقت اللي دعوا لدمج عملية التحرير بال 2000 مع عملية التحرير بال 2005).

عماد مغنية: عماد شخص نادر الوجود. يمكن بالعالم في 2-3 متلو . كارلوس مثلاً او عبدالله اوجلان (والاثنين سلمو لاعدائون من قبل النظام السوري ما غيرو. شوفو الصدف). عماد شخصية امنية نادرة دوخت الاسرائيليين على مدى اعوام. اغتيل في وسط دمشق وباكبر حي امني حد السفارة الايرانية. في حال كان الموساد هو الفاعل بيكون نظام الممانعة ساقط بحماية قلب دمشق متل ما سقط بحماية المفاعل بدير الزور ومتل ما تخلى عن الجولان ليديرها عحلب وحمص ودرعا. اما الفرضية التانية فهي خلافات اما داخل محور الممانعة بين سوريا وايران او خلافات داخل حزب الله بين تيارات متعددة ادت لتصفية مغنية.

انا شخصياً من هالتاريخ بعطي النسبة الاكبر للنظام السوري وما بستثني اسرائيل من كل هالاغتيالات. بس طبعاً مني محقق عدلي لاجزم بالحقيقة على افتراض انو في شي حقيقة بتظهر بهيك قضايا.
شو بيعني هالاتهام؟ هل انا من 14 آذار اكيد لا؟ وهل انا من 8 آذار اكيد لا ؟ انا برات هالاصطفافين الطائفيين بالنهاية. وهيدي خلاصة حديثي وهيك بتمنى من كل الشيوعيين انو نكون برات الاصطفافات فعلاً لا قولاً وما نرجع على طوايفنا او نلتحق بطوايف تانية لنكون مش طائفيين. منطلع من برات هالاصطفافين وما منفوت مع ولا طايفة لانو كلون رح يطوفو علينا بالآخر. 

الخميس، 18 أكتوبر، 2012

عينات يا رشيد

يا رفيق رشيد صلي عالنبي.
بشرفك ما تدوخنا. بدك تحكي حكي علمي مش غلط. بلتقي انا وياك عمركز الحركة الاجتماعية عبدارو ومنحكي. بس خلينا نتطلع شوي. خدلك هالعينات من المجتمع:
جيسي طالعة من "سكاي بار" الساعة 4 وج الصبح مسربة عبيتها، ريحة ال "جاك دانييلز" فاحة منها والعرق عم يزرزب عقد الرقص من الشورت (يللي اشبه بالكيلوت). هيدي بشو بدك تحكيها بالمادية الجدلية. 

ابو قاسم عم يشرب متة عالبرندا بالجبل ومامن عحياتو مع وليد بيك عاساس انو ما في حدا بيحمي غير البيك. كيف بدك تقنعو انو في شركات تأمين عالحياة غير البيك "سنا" يا اخي. وطبعاً ما رح تجي تحكي عن الاشتراكية العلمية لانو هوي بيعرف بس الاشتراكية الجنبلاطية.
احمد نازل من باب التبانة بباص الاحدب (وعايف اخلاقو)عالزايتوناي باي (عنجد اسمها عبري عراية السلام لاسمو زياد) بيشتغل عالليناز تحت. كان مقتنع انو الشيخ سعد هوي اقوى واحد بس هلق صار يحبو لداعي الاسلام الشهال لانو اقوى. مشغل فضل شاكر "سوف نبقى هنا" . بدك تقنعو انت اكتر من سالم الرافعي انو نظرية التطور الطبيعي تبع داروين صحيحة.
ام علي راجعة من حقل الحشيش ببعلبك يللي كانت القوى الامنية عم تتلفو وبتحلف وحياة السيد. مع انو يبدو من اجتماع بري مع فعاليات بقاعية انو عم يرفع ايدو عنون وصار بدو تدخل الدولة عالبقاع. شو السبب بهاللحظة بالذات. الله اعلم. 20 سنة عم يحكو عن التنمية وما طبقوها مع انو حركة امل بالحكومة من 20 سنة وحزب الله من 7 سنين . طيب وين التنمية. بشو بدك تحكيها لام علي بصراع الطبقات. 

" ثلاث اشارات استفهام (عراية ابن عمنا توفيق بو قعقور) انت ملاحظ التلازم بين زراعة الحشيش والحركات الاسلامية. افغانستان اكبر بلد مصدر للافيون بالعالم 90% اذا مش غلطان. ونفس الشي عنا. ما بعرف يمكن الافيون بيحن عبعضو . افيون الدين والافيون الحقيقي. فاصلة منقوطة"
منرجع. هاي عينات يا رفيق من المجتمع يللي نحنا فيه. انت هلق ببرلين. انا I haven't been in Berlin . وشايف كل هودي.
انا وياك فينا نحكي كتير بداروين وماركس ونيتشه و العظم وابو زيد والجابري وطرابيشي وغيرون كتير. بس هودي الجماعة ما فيك تحكيهون هيك. اساساً يمكن بعض رفاقنا ما فيك تحكيهون هك لانو بيغب عقلبون كمان.
يمكن منشان هيك صار عمرنا 88. بس بعدنا عم نجهد ببعض الاعتصامات لنلم 88 رفيق يشاركو. 88 رشيد تيسكرو السير بالحمرا. ما عم يسكر السير. فبدل ما يسكرو السير بيروحوا هني يسكروا بال"ة" مربوطة .
انا معك يا رفيق انو نحنا عنا النظرية وعنا المنطق ومعنا الحق. ومش انا بس مقتنع هيك هني هودي الناس بجزء منون بيبصمولك انو انت معك حق. بس رغم هيدا وكلو في ثغرة ما في مكان ما ما عم نقدر ننفذ منها لهالناس. هون لازم الشغل يصير. خطابنا ممتاز ونظرياتنا ممتازة وكل شي ممتاز بس حبل التواصل مقطوع.
يا ريت اذا فيك انت او حدا من الرفاق يساعدنا بهالموضوع.

الثلاثاء، 16 أكتوبر، 2012

نط فيليكس يا رشيد

نط فيليكس يا رشيد. 
نط فيليكس وكسر شي 6-7 ارقام قياسية وانو شايف حالو وناسي انو نحنا مكسرين ارقام قياسية بالتبولة والحمص والفلافل. يروح يشوف كتاب غينيس. 
نط من السماء على الارض ونحنا عم ننط من القرن الواحد والعشرين على ايام قريش بمساعدة براءة المسمين وفاتح 1453. 
نط فيليكس بعد دراسة 7 سنوات ليعمل تجربة. ليك شو بهلة. ب 7 سنين نحنا منعمل العمايل نحنا منعمل حروب وقتال. فاضيين للتجارب. في صراع سني- شيعي. او متل ما قال مظفر النواب (قدس الله سره) : "اقتتلوا بسيوف السنة والشيعة والعلويين بل والمنقرضين ايضاَ. 

نط فيليكس بسرعة خارقة. ولا فيليكس نحنا مننط من الجبل على البحر بنص ساعة. بس لوما العجقة عم تبعصنا عالدورة والصياد والرحاب. 
نط فيليكس واخترق جدار الصوت. نحنا يومية في طائرات اسرائيلية عم تخترق جدار الصوت وتخترق السماء. بس مؤخراً بعتنا ايوب تيخترق. 
نط فيليكس عن ارتفاع 128 الف قدم. ونحنا عنا 128 واحد يومية بيلبطونا اكتر من الف قدم. يعني نحنا اعلى من ارتفاع 128 الف قدم. 
نط فيليكس مفكر حالو اول واحد بيعمل قفزة حرة. ونحنا عنا شي 4-5 صاروا ناطين عن صخرة الروشة بعد يأسون من البلد. 
نط فيليكس وانجلقوا عالفايسبوك وتويتر. يا ريتوا ما نط قديش كان وفر علينا بوستات وكلمات.
نط فيليكس يا رشيد. 

الجمعة، 12 أكتوبر، 2012

ابو العلاء المعري يغني Metal

قبل ان تظهر موسيقى ال Metal بمواضيعها المختلفة حول : الموت والحقد على البشر والالحاد والايمان و عبادة الشيطان وغيرها من التفاصيل، كتب ادباء وشعراء في كافة اقطاب العالم هذه المواضيع. 
وفي الحضارات الغربية يعود بعض موسيقيي ال Metal الى تراثهم الوطني ويستقون منه قصائد لشعراء كما تفعل فرق فرنسية وبريطانية او اساطير من فولكلورهم كما يفعل بعض الفرق الاسكندينافية بالعودة الى تراث الفايكينغ مثلاً ... 
فرق ال Metal العربية عامة تبتعد كثيراً عن تراثها هذا وهي بشكل عام ايضاً تغني باللغة الانكليزية بصفتها اللغة الجامعة في هذا النمط الموسيقي. باستثناء بعض الفرق التي غنت باللغة العربية كفرق "نار جهنم" البحرينية و "النمرود" السعودية و"آيات" اللبنانية.
والحقيقة ان العودة الى التراث العربي وغناء واحياء بعض القصائد العربية قد اثبت نجاحاً في اعمال الفرق المذكورة. خاصة ان التراث يحتوي على مواد كثيرة يمكن استعمالها. واركز هنا على قصائد ابو العلاء المعري لما يختص به من شخصية سوداوية وقصائده المختصة بموضوع الموت ونقد الدين وما شابه ولكن هناك شعراء كثر تطرقوا لمواضيع مختلفة يمكن العودة اليها. 
فيما يلي بعض قصائد ابو العلاء ويمكن الاطلاع على المزيد منها في موقع ادب.



قضى اللَّه أنّ الآدميّ معذَّبٌ،إلى أن يقول العالِمون به: قضا
فهنّىء ولاةَ الميتِ يومَ رحيله،أصابوا تُراثاً، واستراح الذي مضى

حياةٌ عناءٌ، وموتٌ عنا؛فليتَ بَعيدَ حِمامٍ دَنا
يدٌ صفرَتْ، ولَهاةٌ ذوَتْ،ونفسٌ تمنّتْ، وطَرفٌ رَنا
ينافي ابنُ آدمَ حالَ الغصون،فهاتيك أجنتْ، وهذا جنى

إن يقرب الموتُ منيفلستُ أكرهُ قُرْبَهْ
وذاكَ أمنعُ حِصْنٍ،يصبِّرُ الق دَرْبَهُ


إن مازت الناسَ أخلاقٌ يُعاشُ بها،فإنهم، عند سوء الطبع، أسواء


قد حُجِبَ النورُ والضّياءُ،وإنما ديننا رياءُ
وهل يجودُ الحيا أُناساً،منْطوياً عنهُمُ الحياءُ؟
يا عالمَ السَّوءِ ما عَلِمناأنّ مُصَليّكَ أتقياءُ
لا يكذِبَنّ امرؤ جُهولٌ،ما فيك للهِ أولياءُ
ويا بلاداً مشى عليهاأولو افتقارٍ، وأغنياءُ
إذا قضى اللَّه بالمخازي،فكلُّ أهليكِ أشقياءُ
كم وعظ الواعظونَ منّا،وقام في الأرضِ أنبياءُ
فانصرفوا، والبلاء باقٍ،ولم يزُل داؤكِ العَياء
حكمٌ جرى للمليك فينا،ونحن، في الأصل، أغبياءُ


رُوَيدكَ قد غُررتَ، وأنتَ حرٌّ،بصاحب حيلةٍ يعظ النّساءَ
يحرّم فيكمُ الصهباءَ صُبْحاً،ويشربُها، على عمدٍ، مساءَ
تحسّاها، فمن مزجٍ وصِرْفٍيَعُلُّ، كأنَما وَرَدَ الحِساءَ
يقولُ لكم: غدوتُ بلا كساءٍ،وفي لذّاتِها رهَنَ الكِساءَ
إذا فعل الفتى ما عنه يَنهى،فمن جِهتَين، لا جهةٍ، أساءَ

الثلاثاء، 9 أكتوبر، 2012

كنا خمسة بالتاكسي 4: صوت الشعب

عادة بس تطلع باي وسيلة نقل مفروض تسمع راديو في حال عدم توفر كاسيت (على وشك الانقراض) او CD او ما شابه.
ويمكن الراديو بعدو شغال بس لانو عم ينسمع بوسائل النقل. لو ما منهون بيتوقف. ما بتخيل بعد في ناس عم تسمع راديو بالبيوت او قليل جداً. 
بوسائل النقل الخاصة، يللي ببلدنا كتير كتيرة لسوء الحظ وعم تعمل عجقة، والسبب بكترتها عدا عن رداءة وسائل النقل العامة من باصات وسرفيسات، السبب الرئيسي حب المظاهر وشوفة الحال. مرة احد شوفيرية التاكسي قلي شو بتشتغل، قلتلو مهندس. قلي مهندس وما معك سيارة. ما بعرف اذا عيب هالشي. 
اذن بوسائل النقل الخاصة، فيك تسمع الشي يللي تحبو وما حدا بيعترضك انا بسمع بسيارتي Heavy Metal حدا حريجي؟ ويمكن اسمع ام كلثوم احياناً حسب ما بتهبلي. وما في تناقض لانو الموسيقى الحلوة بتنسمع كيفما كانت. وطبعاً الدني اذواق منشان هيك منشوف المتبخترين بشارع الحمرا بيرشوا "الترشرش" في كل مكان. وما بعرف ما بتحلالون يسمعوها غير بصوت عالي ما بعرف ليه. خيي انا بسمع Black Metal بسيارتي بس ما بخليك تسمعها انت والجيران ووعي الحي مش حلوة يسمعو Dani Filth او James Hetfield بركي اجاهون الكفر يا اخي. انا شخصياً كفرت بس من ورا "الترشرش". 
ولانو الدني اذواق ممكن نشوف ونحنا رايحين عمهرجان للحزب الشيوعي بذكرى جمول، معبئين ثورية، شيوعيين عم يغنوا ترشرش او بحفلة للحزب الشيوعي بيوم المرأة العالمي يحطو غنية محمد اسكندر "جمهورية قلبي" او ونحنا ضاهرين من حفلة لخالد الهبر ومطروبين سيارة عم تسمع "طلقني يا عبدو". غريب. اذا هودي الناس اللي مكرسين للتغيير عم يسمعوا هالاشياء يللي هيي مش مفروض يقربوا عليها فسلم على التغيير.


كل شي Mainstream . كل شي تجاري وروتانا ووليد بن طلال وروبرت مردوخ بعدو عنو يا رفاق. بالعربي وبالاجنبي كمان.
انا بعدني راديكالي ومكتر. بيقولو انو هالشغلة بتخلص باوائل العشرينات بس انا بعدني مكفي. وبس تكون راديكالي ما تتنازل. اذا بدك تسمع "ترشرش" بتجر معك عغير اغاني وبتتنازل ومتل ما بتتنازل بالفن ممكن تتنازل بالسياسة وبالثقافة وبالمحتمع وبكتير اشياء. انو يابا كنت مقاطع بس انو بقطعلي مرة Burger King> فبتصير تقطع مرة وتنين وتلاتي. ما تتنازلوا. 
سمعوا صوت الشعب يا اخي. ما بتشكي من شي. صحيح بمرحلة من المراحل كانت بلشت تبث هيفا وهيدا اعطل شي ممكن يصير.بس معليش. انو اذا انتو الشيوعيين ما سمعتوها منتظرين حلفائنا بحركة امل او بالتيار العوني يسمعوها ولا يفوتوا بنادي اصدقائها يعني.
 منيحة صوت الشعب. احلى منون كلون. 
اكتر شي بكون سعيد لما بطلع بتاكسي ومش ضروري نكون خمسة وبيكون الشوفير حاطط صوت الشعب ولو حتى الموجز يللي بيتكرر كل ساعة. بس انو بتحمل.
واكتر مرة فرحت لما طلعت مع سائق رفيق من عكار، وكان هوي مطفي الراديو وعامل حالو صوت الشعب. ومش مكترث بالركاب. و "طق طق طق طقطقتيني". "هيدا كاس وهيدا كاس ولكن بيضل المقياس وشو ماركة القنينة"

ملاحظة: بالمناسبة غنية كنا خمسة بالتاكسي ما رح تسمعها بحياتك على راديو وحتى على صوت الشعب. روح اشتريها. 

الأربعاء، 3 أكتوبر، 2012

كنا خمسة بالتاكسي 3: Whatsapp

عامة شوفيرية التاكسي ناس كبار وعايفين الدني وممكن كتير زهقانينبدون يحكي وانا انسان بحب الصمت. احدهم مرة خبرني انو كان يشتغل عند رئيس حكومة اسمو عبدالله اليافي يعني مدري ايا سنة. حدا سامع فيه لليافي. زلمي كبير يا اخي. مدري كيف بعدو عم يسوق.
بس انو صار في شباب بمطلع عمرون يجوز انو وضع البلد مش مخليون يشتغلو شي غير عالتاكسي اللي صارت حل وحيد لالون.
وعامة كل شوفيرية التاكسي كبار او زغار، هني سبب رئيسي بكتير حوادث لانو متل ما خبرني واحد منون بيشوفو العالم "الفين"، اي راكب محتمل هوي "الفين". والصراع على هالراكب بين بعضون او حتى اللهفة على هالالفين ممكن تسبب حوادث. 
هلق ممكن يكون الراكب اكتر من الفين في حال كان سهل بلفو بسرفيسين مثلاً او انو هوي حمار (احدى المرات يا بابا كنت طالع من الكولا عقريطم بالفين، فبيطلع راكب فرفور بال16-17 عالظريف ورايح عالروشة، قبل ما بيطلع بيشترط على الشوفير انو سرفيسين، وبعد ما طلع دفعلو 7000 ل.ل.، هلق طبعاً السائق استغرب الوضع فسألو شو هودي، اجاب الراكب انو سرفيسين فطبعاً حل الصمت والوجوم عشوفير التاكسي : هيدي حالة استثنائية صار الراكب فيها سبعة آلاف مش الفين).
يعني مش ناقص شوفيرية التاكسي غير ال whastsapp لحتى يزيد عدد الحوادث. يعني احد هالشباب طلعت معو، بيسوق وبيلعب whatsapp. عم تتخيلو قدي ممكن يزيد عدد الحوادث عال whastsapp. يعني مش ناقصو لهوة عن الالفين. لاقولون حلة.
whastsapp شو هالظاهرة يا اخي. انو معهون حق الكبار العالم بطلت تحكي مع بعضا. قديش الاهل بيعنو وبينقو من ال whastsapp. انو يا اخي ولادنا ما عم يحكونا. بس حقيقة.
انا برأيي انو بدل قانون منع التدخين منعو ال whastsapp بالتاكسي. منيحة والله. وبتخفف كتير حوادث وبتنقذ ارواح. آمين.