الثلاثاء، 27 نوفمبر، 2012

حزب جديد: لحم بعجين


لا يا رشيد، نحنا ما فينا ننطر لبكرا حتى نشوفو لسركيس. نحنا اليوم لازم نتحرك.
اليوم انا بدي سكر السير بالحمرا وبدي اطلع من الحمرا عبربر سبيرز باخد معي دزينة لحم بعجين ومن هونيك عالوتوات عمركز الحزب.
ليه لحم بعجين؟ لانو حزب جديد لحم بعجين. لبنان جديد لحم بعجين من زمان والعالم العربي كمان لحم بعجين وعملو ثورات وطلعت لحم بعجين. ايه شو نحنا عنوة عن العالم؟ انا كنت مفكر انو نحنا غير بس طلعنا نحنا كمان لحم بعجين.
كان صرلي شي جمعتين عرفت بالفضيحة الجديدة وزامم لحديت ما حدا من رفاقنا بالحزب الاشتراكي بيبعتلي الخبر، ساعتها عرفت انو الموضوع تسرب لبرات حلقات الحزب الضيقة وواصل لوين على اذاعة اليمين والجبهة اللبنانية عال MTV وعلى موقع Now Hariri. يا شماتة آبلة ظاظا فيا يا رشيد.
رشيد في سوس عم ينخر. قلنا طلع الياس عطا الله ومنير بركات وانو هودي حسب زياد الرحباني منون غير دحيريجة. عال. (ما بدو زياد يكتبلو شي غنية للسيد حسن بالاخبار، هيدا اخونا جورج وسوف عاملو غنية لبشار).
فجأة بيتبين فضيحة بيع الاخبار وفضيحة اليسارية وفضيحة الوظائف والمحسوبيات. عرفنا ساعتها انو بعد في دحيريجة بالقيادة وبالمعارضة. دحيريجة في كل مكان.


بس هيدا كوم وفضيحة بيع السلاح كوم. بدك تقلي شو فيها خيو لنعيم قاسم باعون للجيش الحر سلاح المقاومة. هيدا تاجر وشو ما دينك الله يعينك درزي بوذي او كاثوليك. ونحنا كمان عنا تجار وباعو سلاح. لمين؟ يمكن للجيش الحر يمكن لجيش الاسد. الله اعلم؟ بس باعوا سلاح مقاتل في يمكن جمال ساطي ولولا عبود و يسار مروة والياس حرب وانعام حمزة و حسام حجازي وميشال صليبا ووفاء نور الدين وآلاف غيرون. مقاتلين فيه اسرائيل.
بعد فيه عفن كتير. بتقلي عريضة. عريضة لمين بدك ترفعها. للينين او لماركس او للاحزاب الشيوعية العالمية. ما بعرف رفعها لقدري جميل وهوي بيوديها لبشار. لمين بدك ترفعها. بالمدرسة في ناظر او في مدير بتروح لعندو وبتفسد عرفيقك. طيب اذا المدير عم يغلط بتروح عمديرية التفتيش التربوي. طيب نحنا عنا المدير عم يغلط والتفتيش التربوي (الكومنترن سابقاً) مش موجود لمين بدك تتشكى. الشكوى لغير الله مذلة.
هيدا الحزب هيك صار يا رشيد لحم بعجين وابو الجواهر شغال. كان مفروض الله لا يوفقو بس وفقو. شو بدك تعمل بتعترض عارادة الله سبحانه وتعالى. هلق بعد شوي بيفتحلك سبانخ مع اللحم بعجين.
تركني بدي آخد نفس طويل. اني اتنفس تحت الماء اني اغرق اغرق اغرق.

ليست هناك تعليقات:

إرسال تعليق