الخميس، 1 نوفمبر، 2012

كنا خمسة بالتاكسي 5: سكس


عادة يعني الناس اجناس. وفي جنس من الناس عندو اهتمام زايد عن اللزوم بالجنس وبالعالم العربي بيبرز هالجزء هيدا عند الذكور تحديداً.
وشوفيرية التاكسي شو بالله؟ ما هني جزء من الناس وبالتالي في جزء منهون عندو اهتمام زايد بالجنس النسوي.
مجموعة اشياء من يللي منصادفها يومياً:
1-       شوفير تاكسي شاف وحدة من لابسات الشورت القصير جداً والدارج حديثاً فبلش يسبسب ويلعن هالزمن.
قال مرة كان في زوجة نائب لبناني سابق (لن يتم ذكر اسمه هنا) كانت بالستينات مع موضة الميني جوب واقفة عمدرج مطار بيروت (مطار رفيق الحريري حالياً). هلق عخبريتو شافها شاب كردي جايي من ريف سوريا وبعدو ما شايف هالمناظر هيدي فاغتصبها على الملأ ولم تنفع تدخلات الدرك في ردعه عنها. معقولة، بتصير.
هلق البنت بالمجتمعات العربية لما بدها تلبس ثياب محددة بدها تتعرض لحوادث محددة. لانو الكبت الجنسي عنا كبير لدرجة هائلة.

2-       هلق حتى ولو لم تكن لابسة ثياب محددة، عادة التلطيش والتجغيل طبيعية.
احدهم طلع معو صبيتين وانا. كنا اربعة بالتاكسي مش خمسة (بس عم نستخدم الاسم منشان القافية مش اكتر). المهم اخونا كاين شاعر بالزمان بلش يكتبلون قصايد غزل. وبما اني انا جالس ورا جنب الفتاة الجميلة، قلي :"بتقوم بتسوق و بتقعدني الي ورا". ما بعرف انو بصير انا باخد منو الفين. اما البنت يللي قدام فما معها غير الفين، قلها "كيف بدك ترجعي، انا بروح برجعك".

3-       اذن مرة جديدة عالارجح ما خص الثياب النسائية لانو مرة طلعت من بدارو على الكولا، يومها طول المشوار شوي لانو شوفير التاكسي بدو يطلع على مؤخرة كل انسانة ماشية على الطريق. وبدو يوقف على جنب ويسالها :" وين واصلة، مدموزيل؟".
هلق لهون كلو بسيطة بس انو بس صرنا عصبرا وبعدين الجامعة العربية، انو في نساء محجبات ما وفرهون الاخ من تلطيشو. هلق اكيد انو هني محجبات منشان يتفادو هالامور مبدئياً بس انو الاخ الح يلح اصراراً على التلطيش.  
(عالهامش شو هالموضة السئيلة هاي انو تسال كل واحد واقف عجنب الطريق اوعم يقطع الطريق :"وين واصل او واصلة". خيي هوي لو رايح لمطرح بيوقفك وبيقلك. ما ضروري تسال كل مواطن وين واصل. شو دخلك انت وين واصل. متل مشهد مسرحية "بخصوص الكرامة والشعب العنيد")

4-       وعادي كمان وبالغربية وبالمناطق المحافظة دينياً. شاب صغير طالع مع خالتو المحجبة ايضاً بالتاكسي وطلعت انا. وفي خلاف دائر حول انو اذا ممكن هالشاب يسمحلا تدرسو او بدو يعاند خالتو.
هلق هني نزلو من هون، قلي "ليك هيدا شو بهلة ما بدو ياها تعلمو. انا لو عندي هيك خالة كنت ببلع الكتب بلع".
وتابع اخونا سمعت غنية كارلوس الجديدة قال عم يقلد ملحم زين "كان بايدي متل الحديدة" ولا هيديك الغنية "العالم ببيوتون بينامو وصدرك نايم نصو برا". (معقولة ولو الله). لحد هون وبس. 

وفينا نعد ونمد، بس اكيد في مشكل كبير مش بس بشوفيرية التاكسي، بالمحتمع العربي المكبوت جنسياً. وينك يا ويلهلم رايخ. وينك يا هشام شرابي. 

ليست هناك تعليقات:

إرسال تعليق