الجمعة، 4 مايو، 2012

كنا خمسة بالتاكسي 1: يوم القيامة

لمتابعة اخبار التاكسي اللبناني وعجائبه سنخصص حلقات متتالية من "كنا خمسة بالتاكسي" (العنوان عائد لاغنية للفنان سامي حواط). هنا الحلقة الاولى عن يوم القيامة. 

- دورة معلم. 
- تفضل. 
مفروض انو تكون الطريق من نهر الموت عالدورة يللي رغم انو عامة بتكون عاجقة قصيرة نسبياً. بس هالمرة كانت طويلة زمنياً من ما قبل المسيح لايامنا. 
اول ما طلعت بالتاكسي تفاجأت بورقة معلقة على "التابلو" : يوم القيامة سيكون في "15 تشرين الاول 2020". طبعاً شي بيلفت النظر وبيضحك بنفس الوقت. 
طبعاً طلع اخونا من معتنقي احدى العقائد الانجيلية او ما شابه ذلك. وما لحقت طلعت حتى بلش يخبرني عن كيف رح تقوم القيامة بهالتاريخ المحدد. الاخ عامل حسابات بناء على الانجيل و العهد القديم والعهد الجديد وخزعبلات عن تاريخ خروج بني يعقوب من مصر ودخول موسى لفلسطين وكيف وليش والله والملايكة. ولحقوا على اخبار وآيات. 
دعانا اخونا المتقدم تكنولوجياً (المتأخر عقلياً) انو زور صفحتو على الفايسبوك لحتى اتطلع بالتفاصيل على كيفية تحديدو لهالنهار المذكور. وانا وعدته خيراً. لانو ما الي جلادة شارع الساعة خمسة بعد الضهر ولا الي جلادة نقب بالتاريخ تاعرف يوم القيامة. يللي اذا افترضنا انو موجود فانا مفروض كون من رواد جهنم حتى يزيد العذاب يللي عم نتعذبو على الارض بالسما. فما ضروري نتعب حالنا كتير تنغير خاصة انو هالفترة من 2012 ل 2020 مش رح نقدر نغير فيها كتير طباع. 

منا جديدة هالقصص "النص كم". السنة الماضية طلع حدا قال انو باليوم الفلاني من 2011 رح تقوم القيامة ونشر اعلاناتو على الطرقات بلبنان متل ما عملو صحابو باميركا. وتاني نهار لما ما صار شي طلعو بتفسير "خزعبلاتي" عن التقويم الروماني. نفس الشي صار سنة ال 2000 وقت ما توقعو انو يخلص العالم لانو رح ندخل بالالفية الجديدة. بس طلع في غلط بالتقويم الهجري او الروماني. هيدا اذا ما استثنينا غباء هوليوود بالفيلم يللي اسمو 2012. هلق معظم الاديان بتترك هالموضوع لالله حتى يريحو حالون من الحسابات.
ايمتى رح يتعظو هالعالم ويوقفو شم "هيرويين الشعوب". على امل قريباً. لانو يوم القيامة قريب متل ما بيقولو. انتبهوا. 

وساحب فينا هالتاكسي. 


هناك تعليق واحد:

  1. obeidwissam.blogspot.com
    i added u and this is my Blog to add
    obeidwissam.blogspot.com

    ردحذف