الاثنين، 30 أبريل 2012

ما في بالميدان .... الا حديدان




المشهد 1:

-          تفضل معلم.
-          هودي بس 1500. بدي 2000.
-          بس انا عطول عم ادفع 1500.
-          ايه بس هلق صارت تنكة البنزين ب 40000.
-          تفضل معلم هيدي 500.
حديث تقليدي. ممكن كان ان يتطور.
-          تفضل معلم هيدي 500 . بس انو انا شو ذنبي. فيك تحكي مع طايفتك او مع زعيمك اذا بيعطوك هني ال 500 او بيرخصولك سعر تنكة البنزين.
او
-          تفضل معلم هيدي 500 . بس تبقى تفضل شارك معنا بس نكون بالتظاهرات شي 20 واحد شيوعي.

المشهد 2:

-          انتو الشيوعيي جماعة "حدادة" عطول مع 8 آذار.
-          خلينا نناقش هالجملة مفصلاً. اول شي مجرد وصف الشيوعيين يللي منتسبين او مناصرين للحزب الشيوعي "المركز" (كما صار يعرف بادبيات ما بعد ال2005) بجماعة حدادة هوي حدث كوميدي.
خاد حدادة (مع احترامنا لشخصو) هوي امين عام للحزب حالياً. قبلو كان في امناء عامين وبعدو رح يجي امناء عامين. فمنو متل جنبلاط او بري او الحريري او عون او غيرون تنقول جماعة حدادة متل جماعة اي حدا. ربما تسمية الشيوعيين بتضلها اصدق وكافية. بعدين هالشيوعيين لاحقين فكر ومبادئ ومنون لاحقين شخص محدد حدادة او غيرو. وهون في فرق شاسع بينون وبين بقية الاحزاب اللبنانية. هيدا عدا عن انو ممكن نوافق على أراء خالد حدادة او قيادة الحزب بشكل كامل او جزئي او ممكن نعارضها كلياً و الاحداث السورية وموقف الشيوعيين ههي دليل على التنوع في الآراء الموجود.
اما فيما خص الجزء الثاني فمع انو الشيوعيين منون جزء من حلف 8 آذار. بس اعتبروا مقربين لالو لسبب دعمون للمقاومة. واذا منشيل التقاطع مع 8 آذار على موضوع المقاومة والمشاركة بحرب تموز 2006 وتقديم شهداء شيوعيين ما منلاقي نقاط تقاطع تانية. من اولها ما شارك الحزب الشيوعي بمظاهرة شكراً سوريا ب 8 آذار 2005 ولا بمظاهرة 14 آذار وكان الو مظاهرة مستقلة آنذارك ب 13 آذار. ومن ثم  ما شارك باعتصام المعارضة بوسط بيروت الا عبر مظاهرة وحدة. وكمان كان ضد 7 ايار كمبدأ عدم زج المقاومة بالداخل. وهيدا كلو واكيد ما كان مع 14 آذار لانو كانت بالحكم وكانت عم تاخد نصيبها من الانقادات من قبلو. اما بظل وجود 8 آذار بالحكم فرح تاكل نصيبها كمان.

المشهد 3:

-          ولك يا زلمي ما حدا عم يتحرك.
-          مبلا في ناس عم يتحركو. من سنين وهني عم يتحركو وخلينا نحكي بالاشياء الاحدث.
من اول ما بلشت الثورات العربية تحرك ناس تضامناً مع مصر وتونس وليبيا . ومع البحرين برغم تطييف الصراع . ومع سوريا برغم كل التحفظات.
ومع كل شي كان عم ييصير بفلسطين وبغزة. كان في ناس عم تتحرك. مؤخراً قضية الاسرى : خضر عدنان وهناء الشلبي وغيرون.
وقت كل قرار اقتصادي تعسفي كان في ناس عم تتحرك ولو بالعشرات.
وقت اللي اقيل شربل نحاس برات الحكومة في ناس تحركو تضامناً معو.
وقت اللي مات علي شعبان برصاص الجيش السوري في ناس اعتصموا تضامناً معو.
وقت اللي ضهر العميد العميل في ناس من بينهن اسرى محرري اعتصموا رفضاً للقرار التعسفي.
وقت اللي في شباب اعتقلو لانو انتقدو هالقرار في ناس تحركت تضامناً معون.
وبكرا ععيد العمال في ناس رح تتحرك. بس رح يتحركو لوحدون. لانو "ما في بالميدان الا حديدان" متل ما بيقول المثل وهالحديدان هو اليسار اللبناني.
               
المشهد 4:

-          باول مشهد اللبنانيين مش راضيين وعم ينقوا بس ما بيتحركوا.
-          بتاني مشهد اللبنانيين شغلتون ينمطوا العالم  متل ما بدون وعن جهل.
-          وبتالت مشهد اللبنانيين يللي بيغيب الاعلام عنون التحركات او بيتجاهلوها.
-          بما انو  "ما في بالميدان الا حديدان" (اليسار اللبناني) وبما انو "كما حنا كما حنين" ( يعني الشيوعيين متلون متل بقية الشعب اللبناني عم يتعرضو لنفس الظروف) لازم حنا يوصل لحنين فكرتو حتى يتحركو معو على الاقل بعيد العمال.

هناك تعليقان (2):

  1. بغض النظر عن الرأي السياسي والإقتصادي والشعبي، خيي شو كنت حاسس لمن نقيت هل خط ونقيت هل باكغراوند معو، عذاب يضاف إلى عذاباتنا :) إنو نخلص المقال، أما النقاش فمنعملو وجها لوجه عندما تسمح الظروف

    ردحذف
  2. رفيق ربيع. نقيت الخط الابيض عخلفية رمادية لانو ما في بديل عنو. المقال كنت كتبتو بملف Word وبس نقلتو ما كان في حل غير انو لونو بهاللون.
    اما الخط اليساري فنقيتو كمان لانو ما في بديل غيرو. للحديث تتمة ...

    ردحذف