الخميس، 8 مارس، 2012

عيد المرأة العالمي : نكاية بنعمة الله

- اليوم عيد المرأة العالمي بكل العالم الا بلبنان. ليش؟ لانو النائب نعمة الله ابي نصر ارتأى انو يخترع عيد فينيقي هو عيد الابجدية حتى يحتفي بالاخ قدموس المعلم الاول (خدلك ملا فيل - لو فيون يرجعو لقدموس حتى يعطوا جايزة غينيس ما بيقصروا والله ) وما زبطت معو الا بيوم المرأة العالمي (يعني انو ما بتزبط ب7 آذار مثلاً او 5 ايلول - لا 8 آذار - ما بعرف بس انو منغير من شكرأ سوريا ب8 آذار لشكراً قدموس) ومجلس النواب يللي في 4 نائبات من نوع زوينا جيلبرت زوين و توينا نايلة تويني (عراية الرفيق زياد سحاب) وافق بكل بساطة عالموضوع. 
هلق نعمة الله ابي نصر النائب عن فينيقيا الكبرى هوي ممثل اليمين اللبناني المسيحي والو فتاوى مهمة بموضوع التجنيس والتوطين وحقوق اللاجئين واليمين بكل اطيافو هوي ذكوري بطبيعة الحال. منشان هيك نعمة الله الو كمان فتاوى (بتشبه فتاوى مفتي السعودية) بعدم جواز اعطاء اولاد الام اللبنانية الجنسية خوفاً على الديموغرافيا بفينيقيا.
منشان هيك ونكاية بالذكورية اللبنانية ونعمة الله وبفينيقيا كلها هيدا اليوم بيضلو يوم المرأة العالمي وبهالنهار منحب نعيد نساء العالم كلون. تحية للمرأة الام والمرأة العاملة والمرأة المناضلة والمرأة الشهيدة .....
منهدي هالاغنية لفرقة الطريق: للمرأة غنواتنا.

ليست هناك تعليقات:

إرسال تعليق